Hopi insertidumbre i pregunta relashoná ku e trayekto ku a kana pa buska un operador i futuro di refinashon i di trahadónan di e refineria

Willemstad, 22 di aprel 2020

 

Na Presidente di Parlamento

Señor W. Millerson

P/a Wilhelminaplein # 4

PRESENTE

 

Tópiko: PMO a gasta 31 mion florin pa buska un operador nobo pa refineria di Kòrsou te ku awe e refineria ku a ser regalá pa 1 dòler merikano no ta operashonal, tin hopi insertidumbre i pregunta relashoná ku e trayekto ku a kana pa buska un operador i futuro di refinashon i trahadónan di e refineria

 

Señor Presidente,

 

Suskritonan ta hasi uso di artíkulo 64 insiso 4 di Reglamentu di Ordu (RvO) di Parlamento i ta aserka bo persona pa yama un reunion públiko ku e punto di agènda ariba menshoná. 

 

Frakshon di MFK den Parlamento a tuma nota den medionan di prensa di deklarashon di esnan responsabel pa Refineria di Kòrsou ku PMO a gasta alrededor di 31 mion florin den e trayekto pa buska un operador nobo pa nos refineria.

 

PMO i Refineria di Kòrsou a primintí ku na aprel grupo Klesch lo kuminsá operá nos refineria i te ku fecha di e karta aki esaki no a tuma lugá. Frakshon di MFK ke sa na unda ta para ku negoshashon ku Klesch i otronan i maneho di energia i refinashon pa Kòrsou

 

Ta reina un intrankilidat bou di e trahadónan debí ku faltando 69 dia pa nan kontrato ku CRU finalisá, e trahadónan no sa kiko ta nan futuro laboral

 

Frakshon di MFK kier haña promé ku e reunion un lista di repartishon di e pagonan ku a hasi di e 31 mion florin menshoná i tambe plan di akshon pa ku refineria i Bullenbaai si grupo Klesh no tuma e operashon mas, pa asina nos por hiba un debate dirigí den Parlamento riba e tópiko aki.

 

Frakshon di MFK pa medio di esaki ta pidi Presidente di Parlamento invitá Minister presidente Eugene Rhuggenaath pa ta presente pa nos diskutí tur e puntonan ariba menshoná ku e Minister.

 

Atentamente,

Gilmar Pisas

Charles Cooper

Jacinta Constansia

Gilbert Doran

Juniël Carolina