Komportashon den tráfiko.

KOMUNIKADO DI PRENSA 168 / 2020
22 aprel 2020
Komportashon den tráfiko.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Polis ta tumando nota ku debí na e suavisamentu di e medidanan, entre kua esun di
moveshon (rekreashon), prinsipalmente den oranan di mainta i atardi tin hopi persona ku
ta kana na pia of kore baiskel riba kaminda públiko.
P’esei polis ta hasi un yamada na promé luga na e personanan ku ta kana riba kamindanan
públiko, pa kana mas tantu posibel riba asera, pasobra tráfiko motorisá ta sigui move riba
nos kayanan.
Preferiblemente hasi uso di bestuarionan di koló kla òf karga algu fluoresente, ku ta kapta
atenshon di tráfiko.
Kana mas tantu posibel ku kara pa e tráfiko ku ta bini den direkshon kontrario.
Mayornan, sea asina bon di no kana dilanti i laga menornan di edat sin atenshon ta bini
patras.
Un petishon tambe na siklistanan, en bista ku e dianan aki ta bira sukú trempan, pa sòru pa
bo baiskel tin lus tantu dilanti komo patras.
Por último nos ke pidi outomobilistanan pa tene kuenta ku e kantidat grandi di
siudadanonan ku ta kanando e dianan aki riba kaya tantu den oranan di mainta komo
atardi.
Redusí bo velosidat i kontribuí na un tráfiko mas sigur.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: