Wardakosta huntu ku militarnan di Defensa lo keda patruyá frontera i kosta intensivo

Wardakosta huntu ku militarnan di Defensa lo keda patruyá frontera i kosta intensivo

Ultimo simannan Wardakosta ku asistensha di Defensa den Karibe a intensivá patruyanan na
kosta i den awanan teritorial. E intensifikashon di e patruyanan ta un resultado di e krisis di
corona ku ta asotando henter mundu i tambe nos islanan. Pa motibu di e krisis tur frontera
marítimo ta será pa tráfiko marítimo ku no ta regulá. Solamente tráfiko marítimo di karga tin
permit pa nabegá den e awanan teritorial di e islanan. Piskadónan lokal tambe a keda dispensá
di e medidanan pa nan por keda piska i ehekutá nan trabou vital. E intensifikashon di e
patruyanan den e periodo di krisis di corona ta prinsipalmente pa kontrolá e tráfikashon ilegal di
merkansia i personanan ku ta hasi intento pa yega e islanan ku entre otro droga, munishon i ku
rísiko ku personanan por ta infektá ku e vírùs di COVID-19. E kolaborashon entre Wardakosta i
Defensa tin su efektonan positivo pa e hecho ku ultimamente no a detektá ningun transporte
ilegal. Wardakosta lo keda patruya kosta i laman ku e kolaborashon di Defensa den Karibe pa e
periodo binidero. Banda di e barku di marina real Zr.Ms. Zeeland e barku Zr.Ms. Karel Doorman
tambe lo nabegá pa Wardakosta den awanan di islanan ABC. Zr.Ms. Karel Doorman lo keda
uzá tambe pa tranportashonnan den region di Karibe.
Wardakosta ta hasi un súplika na habitantenan pa na momento ku mira algu sospechoso òf
peligroso riba laman òf na kosta, pa yama Wardakosta riba e number 913.
E number akí ta alkansabel di dia i anochi. Barkunan riba laman tambe por tuma kontakto ku e
Sentro di Reskate di Wardakosta via di e kanal VHF 16 na momentu ku nan mira algu
sospechoso òf peligroso riba laman. Kubo kolaborashon nos por mantené e kostanan i laman
seif durante di e krisis di corona.