Ainda ta pagando empresarionan individual pa luna di aprel
Ainda ta pagando empresarionan individual pa luna di aprel
Geplaatst op 28 May 2020 dor di Ministerio Desaroyo Ekonómiko
WILLEMSTAD- Na nòmber di Gobièrnu di Kòrsou, Ministerio di Desaroyo Ekonómiko (MEO) ta enkargá ku implementashon di pago di sosten finansiero na empresarionan individual ku a keda afektá dor di e situashon di COVID-19. Pa diferente motibu, ainda tin empresarionan individual pendiente pa risibí pago di luna di aprel i MEO ta hasiendo lo máksimo pa pronto finalisá esakinan.
Te ku fin di aprel e ministerio a risibí un total di 3.172 petishon di empresarionan individual pa sosten finansiero. Di e petishonnan aki, pa luna di aprel un total di 2.268 empresario individual ya a risibí e sosten, 343 petishon a wòrdu rechasá i tin 561 ku ainda ta pendiente pago di aprel. Den e petishonnan risibí, MEO a asistí algun di e empresarionan aki tambe pa entre otro registrá na Kámara di Komersio, liber di gastu, pa habri un kuenta bankario i pa atkerí un sédula bálido.
Un empresario individual ta manehá un empresa su so òf ta ehersé un profeshon independiente. Tambe e tin kòntròl por kompletu di e empresa òf e profeshon individual ku e ta ehersé i e ta karga tur riesgo finansiero pa ku esaki. Ehèmpelnan di empleadonan individual ta taksista, shofùr di bus, ehekutor di eksposishon i músiko.
Mirando ku últimamente tabatin diferente opshon di sosten pa e diferente gruponan afektá, MEO a tuma nota ku esaki a krea konfushon serka algun empresario. Pa e motibu aki tin empresario individual ku eróneamente a entrega nan petishon via di un di e otro portalnan.
Si tin empresario individual ku por presentá un komprobante di nan petishon yená via e portal di MiNEGOSHI òf via di esun di SOAW na luna di aprel, esakinan ainda por bini na remarke pa risibí e sosten pa empresario individual pa luna di aprel. Den e kaso aki nan mester inskribí si den e portal pa empresario individual.
Di otro banda tin un kantidat di masoménos 330 petishon ku no a keda finalisá komo ku ta pendiente pa e empresarionan kompletá nan petishon. E petishonnan aki sea ta falta sierto dokumento i/òf ta falta informashon ku ta di relevansia pa e petishon. Hopi di e empresarionan aki ainda no a duna oido na e yamada pa kompletá nan petishon i komo konsekuensia di esaki nan petishon di aprel ainda no a keda kompletá.
E empresarionan en kuestion a risibí un mail for di empresario@fondodisosten.org ku un lenk riba kua nan por kompletá nan petishon. Anteriormente e link aki tabata bálido pa 48 ora, pero pa kumbiniensia di e empresario a prolongá durashon di e link aki te ku 5 dia.
MEO kier rekòrdá ku petishon pa sosten finansiero pa e kategoria di empresarionan individual mester keda yená solamente 1 biaha. Pues si ya bo a yena e petishon kaba anteriormente komo empresario individual via di e página di Fondo di Sosten, http://www.fondodisosten.org, no ta nesesario pa bo bolbe apliká. E portal pa empresario individual lo sera entrante 21 di yüni 2020.
Ministerio di Desaroyo Ekonómiko ta hasi tur lokual ta na su alkanse pa por finalisá pagonan di luna di aprel i pronto kuminsá prosesá pagonan di luna di mei. Empresarionan individual ku mester haña e pago pa un sosten finansiero pa luna di mei i yüni, mester tin tur informashon i dokumento entregá i na òrdu pa por risibí esaki.
