Minister di Salú, Medio Ambiente i Naturalesa, Suzy Camelia Römer ta orguyoso di Zen Farm.     

Minister di Salú, Medio Ambiente i Naturalesa, Suzy Camelia Römer ta orguyoso di Zen Farm.     

 

WILLEMSTAD- Minister Suzy Camelia-Römer resientemente a hasi un bishita kordial na Zen Farm i a keda enkantá ku tur loke e la mira. Zen Farm ta soño di dos hóben komersiante Yu di Kòrsou ku a bira realidat ku sosten di e Fondo Rotativo Agrario ku ministerio di Salú, Medioambiente i Naturalesa tin disponibel pa tur agrikultor, piskadó i kriadónan di bestia.

E empresa aki ta “state of the art” den mundu di agrikultura kual nan produkshon ta basá riba e téknika di hidroponia vertikal i “A-frame”. Usando puru teknologia e dos hóben komersiantenan aki ta produsí diferente tipo di yerba, salada i tambe ‘microgreens’ pa merkado lokal. 

“Ta un plaser pa mira adelanto den e proyekto aki i sinti e positivismo i perseveransia di e dos hóben propietario di Zen Farm, no opstante retonan ku nan a konfrontá den e trayekto pa mehorá kalidat di nan produktonan”. Minister Camelia Römer ta sigui bisa ku Zen Farm mester ta ehèmpel pa tur persona ku tin e soño pa un dia tin nan propio empresa, sea den agrikultura, peska o krio di bestia mira ku trabou duru i dedikashon por logra! Aktualmente tin un grupo di hóbennan lokal ta terminando un kurso di hidroponia bou di guia di University of West Indies di Trinidad & Tobago. Pues mas i mas nos ta preparando mas yu di tera pa traha den e sektor primario aki profeshonalmente.

Nos ta na e momentu krusial ku awor mas ku nunka nos tin di produsí nos mes, pa nos mes. 

Minister Camelia Römer ta deseá Zen Farm hopi éksito i sigui ku e tremendo trabou. Agrikultura ta na moda!