Korpodeko dia 23 di April a konmemorá su di 35 Aniversario
Willemstad, 1 di juni 2020 – Korpodeko dia 23 di April mei mei di e realidat nobo ku nos ta bibando a konmemorá su di 35 aña di eksistensia den silensio, pasó e dianan aki no ta e momento pa selebrá. Pais Kòrsou, nos komunidat i spesialmente nos klientenan ta pasando den tempunan difísil, pero na mes momento pa nos fundadornan pa e tripartidismo i pa e mas ku 1500 klientenan ku a hasi e 35 aña di Korpodeko posibel nos ke rekordá tur pa nan kontribushon.
Apesar di e situashon inigualabel ku Kòrsou i mundu henter ta eksperensiá aktualmente pa motibu di e pandemia COVID-19, Korpodeko ta tuma un momentu di reflekshon pa mira bèk riba 35 aña di sosten balioso na e komunidat empresarial i na bienestar general di e situashon sosial-ekonómiko edukativo na Kòrsou. Manera ya menshoná esaki ta selebrashon di un famia tripartit ku den e transkurso di añanan a krese apesar di tur kontratempu.
Ki ironia di bida na momentu ku Korpodeko ta selebrá su di 35 aniversario meimei di un situashon di krísis okashoná pa e pandemia COVID-19. Netamente Korpodeko a wòrdu fundá na aña 1985 na momentu ku nos komunidat tabata pasando den un krísis ekonómiko i sosial di gran impakto. Den e époka ei tambe diferente kupo di trabou tabata kore peliger. I pa por a kontrarestá e krísis kousá pa diferente faktor, entre otro devaluashon di Bolívar Venezolano, despedida di Shell, e tratado fiskal ku Merka i ehekushon di e rapòrt di Berenschot, gobièrnu di Kòrsou i e partnernan sosial di sektor privá di e tempu ei a tene un kumbre sosial ekonómiko.
Un di e akshonnan ku a disidí durante di e kumbre tabata inkorporashon di un banko di desaroyo dor di gobièrnu i partnernan sosial komo institushon i vehíkulo pa karga e vishon di e desaroyo sosial-ekonómiko proponé pa e partnernan sosial. Di e manera ei Korpodeko a wòrdu fundá dia 23 di aprel na aña 1985 komo un instrumento ku e vishon pa logra promové e balansa sosioekonómiko, i e desaroyo kultural i edukashonal di Kòrsou. Un otro ophetivo tabata pa logra e bienestar sosial-ekonómiko ei ku partisipashon di henter komunidat den e proseso aki. Esaki ta pone ku Korpodeko tin un kompromiso fundamental den nos komunidat, salí for di un akuerdo tripartit, i e kompromiso pa yuda desaroyo nos ekonomia, algun aña despues korpodeko a haña un lisensia bankario i asina reforsá e medionan na su alkanse pa sirbi su propósito. Pues e spiritu di inkorporá Korpodeko tabata pa krea un medio pa bringa e difikultatnan ekonómiko pa medio di konseptonan di desaroyo makroekonómiko ku lo mester resultá den reabilitashon di empresanan i organisashonnan chikí, mediano i grandi.
Invershon/partisipashon di kapital (risk investment) i dunamentu di fiansa, ta un di e poko instrumentonan ku Korpodeko tin pa logra su ophetivonan sosioekonómiko, kultural i edukashonal. Ku e ordenansa Nashonal pa supervishon di banko i institushon finansiero na 1994, Korpodeko a wòrdu kategorisá despues komo un instituto finansiero ku ta kai bou di e supervishon reguladó di bankonan i institutonan finansiero.
Pues reflekshonando riba su orígen i eksistensia Korpodeko a demostrá ku e tei den tempu bon, pero prinsipalmente den tempu ménos bon pa su klientenan i komunidat di Kòrsou en general. Konsiderando e difikultatnan ku nos ta pasando aktualmente Korpodeko a skohe pa siman pasá no selebrá su di 35 aniversario den forma di fiesta. Pero sigur Korpodeko lo ke biba ku komunidat na un forma spesial hasiendo donashon na diferente algun instansia karitativo manera VoedselBank un suma di Naf 10.000, Kas di Anciana Mi Welita un total di Naf 2.000,00 na ekipo di uso i produkto di higiena i Voedselhulp Curacao Naf.1.000,00 i tambe pa medio di e sosten ku ta dunando na su klientenan pa medio di e diferente paketenan di alivio. Den e tempunan aki e sapatu ta primi, pero nos di Korpodeko tin pleno konfiansa ku nos lo vense, pasobra esun ku triunfá un biaha, a demostrá ku e por bolbe hasié.
Nos komunidat en general i empresarial, pais Kòrsou i nos lidernan di País forsa i kòrda nos tur ta huntu den e boto aki.
