KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNUNOTISIA

Personanan den karentena ta risibí bon trato

Personanan den karentena ta risibí bon trato

Willemstad – For di momentu ku e pandemia di Coronavírùs a kuminsá manifestá, e palabra karentena a bira unu konosí rònt mundu. Karentena ta bini for di e palabra Italiano “quarenta giorni” ku ta nifiká 40 dia, kual ta e medida ku a apliká na siglo 14 durante e epidemia di Pèst. Karentena ta isolamentu di un persona òf bestia pa sierto tempu pa evitá ku e por infektá otronan ku e malesa. 

 

Kòrsou tambe tin personanan den karentena relashoná ku COVID-19. Na komienso di e pandemia, e maneho di karentena tabata pa e persona ku ta bin di eksterior keda boluntariamente na kas òf un hotèl òf apartamento. Ora e menasa di plamamentu di e vírùs a  bira lokal, e tim di krísis di gobièrnu a tuma e desishon pa sera tur konekshon aéreo i marítimo pa evitá ku e vírùs aki ta sigui drenta i plama den nos pais. Esaki a keda kompañá ku mas medida manera distansia soshal/físiko i protokòlnan di higiena. Despues ku e maneho a surgi efekto posítivo gobièrnu a tuma e desishon pa kuminsá ku proseso pa de-eskala. Un di e medidanan di suavisashon ta ku entre otro e residente ku tabata pegá den eksterior por kuminsá regresá Kòrsou bèk bou di e kondishon ku tur hende tin ku keda den karentena obligatoriamente, bou di supervishon i monitoreo di e departamento di Epidemiologia di Ministerio di Salú, Medio Ambiente i Naturalesa (GMN).

 

Pa duna kontenido na e maneho di karentena obligatorio Sekretario General di ministerio di GMN a aserká algun instansia manera CHATA i CTB pa aserká e hotèlnan i apartamentonan ku por fungí komo sitio di karentena obligatorio, ABC- Busbedrijf pa hasi e parti di transportashon i TExperience, un kompania ya vèrsá ku ta hasi “crowd management” pa atendé e parti di logístika i di seguridat na e sitionan di karentena. E tim aki ta trahando den estrecho koperashon ku Aduana na aeropuerto, Imigrashon i tambe e  “Reisverficatie Team” ku gobièrnu a instituí pa revisá i aprobá si e petishonnan ta kumplí ku e kriterionan tantu pa e parti aéreo, komo marítimo pa regreso na Kòrsou. 

 

Tur e residentenan aki ya tabatin un pasashi pa bini Kòrsou bèk den nan man i pa e grupo aki gobièrnu ta kubrí gastunan di karentena. Ademas tin personanan den  eksterior ku motibu balido -por ehèmpèl médiko- ku no ta residente i tambe personanan ku ta bini Kòrsou pa trabou ku ta bai den karentena obligatorio. E personanan aki of nan doño di trabou  tin ku paga nan gastunan di karentena. 

 

Algun hotèl a skohé pa brinda e servisio di karentena i ya kasi 500 persona a bai den karentena. Mayoria di nan a tèst negativo i a sali kaba. Entre esakinan ta 3 persona a tèst positivo ku ta aktualmente den isolashon bou di monitoreo i kuido médiko te ora nan rekuperá. 

 

Aktualmente tin mas ku 10 hotèl ku a skohé pa brinda e servisio di karentena i tur nan personal a haña kurso kon pa funshoná den e situashon aki serka Ministerio di GMN.


Kòntròl di GMN ta mustra ku e personanan den karentena por lo general ta risibí bon trato. Komo ku kada hotèl tin su mes maneho kon ta sirbí kuminda, tin ku a skohé por ehèmpel pa sirbi kuminda den baki di foam pa redusí kontakto ku esnan den karentena mas tantu posibel. Den medionan sosial algun persona a publiká sierto potrètnan di tal manera pa krea e impreshon ku e personanan ta risibí un trato mediokre siendo esei apsolutamente no ta e kaso. Nos sa ku algun di e kumindanan tabata rekerí mehorashon i esaki entretantu a keda resolvé i ta den proseso di mehorashon.Ta di lamentá ku ta kuestioná inhustamente Gobièrnu di Kòrsou, ku a invertí i hasi su máksimo esfuerso pa brinda un solushon aseptabel pa tur esnan ku durante e tempu difísil aki mester a regresá Kòrsou. 

 

Pero no opstante esaki nos ta keda duna e servisio di karentena i mehorá kaminda na nesesario pa hasi esaki mas plasentero pa tur esnan pa motibu di e pandemia di COVID-19 mester keda obligatoriamente den karentena.

 

Nos ta gradisí tur esnan ku a ekspresá nan satisfakshon di e servisio ku nan a haña durante e karentena obligatorio na e diferente sitionan. Nan a hasi esaki pa medio di un karta kompañá pa firma di hinter un grupo i tambe pa medio di un plakat di gratitut. 

É gesto aki ta un estímulo pa e tim multidisiplinario ku ta trahando den estrecho koperashon ku otro pa duna e mihó servisio posibel di karentena. 

 

Pa kualke informashon adishonal por tuma kontakto ku señor Sharlon Melfor, Sekretario General di GMN na 560-8693.

639114718427035"
639114718427035"