CRU TA PREPARA PA UN FORMA DI OPERA NOBO i SOSTENIBEL DESPUES DI 30 DI YUNI
CRU TA PREPARA PA UN FORMA DI OPERA NOBO i SOSTENIBEL DESPUES DI 30 DI YUNI
Willemstad- 8 di yuni 2020- Gerensha di Refineria di Kòrsou (RdK) i Curaçao Refinery Ultilties (CRU) ta den preparashon pa kontinuá ku un operashon nobo i sostenibel di e fasilidatnan petrolero despues di 30 di yüni pròksimo. Puntonan di salida pa esaki ta ku ta mantené mas tantu personal empleá na un forma produktivo i ku esaki por keda kargá finansieramente dor di RdK. E transishon pa e organisashon nobo aki ta keda hasi di un forma sistematiko kaminda stap pa stap ta yega na e forma di operá nobo, definiendo e kuponan di trabou den e organisashon plus e sosten ku mester tin pa esnan ku no por sigui mas den e organisashon. Aktualmente gerensha di RdK i CRU huntu ku e tres sindikatonan PWFC, APRI i SGTK ta atendé e transishon sistematiko aki pa por yega na e CRU despues di 30 di yuni di tal forma ku por informá e trahadonan ku aktualmente ta trahando pa CRU i di kwa nan kontrakt ta vense pa 30 di yüni pròksimo.
Manera ta konosi, di yanuari pa yüni 2020, CRU a karga e gastunan operashonal di e fasilidatnan petrolero inkluso salario i kostonan mediko di e personal ku ta laborá riba e fasilidatnan. E fondonan di RdK no ta inagotabel. Komo ku e aktual Partido ku RdK tin un akuerdo di kompra kun’é a indiká ku e no ta bai logra pa finalisá ku e akuerdo pa fin di yüni, pero mas lat, CRU mester yega na un otro forma di operá kaminda por keda mantené e instalashonnan i empleo. E forma nobo aki ta rekerí pa generá entrada i baha gastunan (inkluso esun di personal.)
CRU ta den e proseso pa ofresé tantu e terminal na Bullenbaai komo un parti di e refineria na Emmastad den merkado di almasenahe. Di e forma aki ta generá entrada. Banda di esaki ta hasiendo e eherisionan pa identifiká formanan pa baha gastunan. CRU lo mester sigui garantisá tambe suministro di produktonan na Curoil i preservá e instalashonnan petrolero. Hasiendo esaki, RdK i CRU mester perkurá ku gastunan di operashon ta keda den balansa ku entradanan.
Durante di e próksimo siman lo sigui ku e proseso sistematiko pa yega na e organsashon di CRU despues di 30 di yüni. Huntu kun’é lo stipulá e kantidat i tipo di kuponan di trabou ku lo ofresé na esnan ku no tin trabou mas. Ta importante pa e proseso ta diligente, tranparente i kompletu. Pa e motibu aki ta tuma e tempu nesesario pa por konkluí’e na un forma responsabel i kumpli ku e puntonan di salida.