Diálogo pa huntu traha na un Agènda Stratégiko pa Enseñansa

Diálogo pa huntu traha na un Agènda Stratégiko pa Enseñansa

Geplaatst op 09 June 2020 dor di Ministerio Enseñansa, Siensia, Kultura & Deporte

WILLEMSTAD – Ministerio di Enseñansa, Siensia, Kultura i Deporte (ESKD) den koperashon ku e Program Management Organization (PMO) di Strategia di Kresementu i Stichting Overheidsaccountantsbureau (SOAB), a traha un base pa yega na un agènda stratégiko pa enseñansa pa añanan 2020 – 2022. E agènda ta duna un bista di e punto di salida pa yega na metanan stratégiko pa enseñansa. Huntu ku tur ‘stakeholder’ di enseñansa ta pone prioridat i metanan pa por drecha e kalidat di enseñansa.

Den e proseso pa traha e agènda, Minister di ESKD a asigná un grupo ku ta konsistí di e organisashon di maneho di Ministerio di ESKD, representashon di sektor di Enseñansa i Siensia i representashon di PMO. E agènda a keda desaroyá den un dokumento ku ta elaborá riba kalidat di enseñansa deseá, metanan stratégiko, grupo di enfoke, infrastruktura, finansiamentu, ehekushon di maneho i fortifikashon/refuerso institushonal. Alabes ta pone atenshon na fortifikashon di e ministerio kaminda ta evaluá i analisá e tareanan primordial, teniendo kuenta ku optimalisashon den enseñansa. Automatisashon i digitalisahon tambe ta forma parti integral di e agènda stratégiko, pa asina por tin un agènda moderno i aktual pa nos enseñansa pa e añanan 2020 – 2022.

E agènda stratégiko lo keda tratá ku e diferente ‘stakeholder’ nan den enseñansa ku ta sindikato, direktiva di skolnan, fundashonnan, Kámara di Komèrsio i mayornan. E promé seshonnan a tuma lugá ku representantenan di sindikato i ku direktivanan di skol. Den e periodo benidero lo sigui reuní i dialogá ku diferente otro partner. Den e seshonnan akí lo identifiká i traha na un plan di trabou, p’asina yega na un tomo di desishon kua lo ta e prioridatnan i trayektonan ku lo ehekutá den kuadro di e agènda stratégiko pa enseñansa na Kòrsou den periodo 2020-2022. Na su debido tempu lo duna mas informashon na komunidat di resultado di e deliberashonnan i progreso di e proseso pa finalisá e agènda stratégiko di enseñansa.

—

KOMUNIKASHON

** riba e potrètnan athunto por tuma nota di e vários representantenan na e reunion: Sra. Susan Larmonie-van Heydoorn (Direktor), Sra. Irelnety Copra (Kolaboradó di maneho pa Ministerio di ESKD), Sra. Feiijdi Ayubi-Narvaez (Kolaboradó di maneho pa Ministerio di ESKD), Sr. Wladimir Kleinmoedig (Direktor), Sr. Darius Plantijn (SITEK), Sr. Fransis Josefa (SITEK), Sr. Sidney Genoveva (PMO), Sra. Sue-Ellen de La Paz (SOAB), Sr. Adri Willem (ABVO) i Sr. Luthson Lucas (STTK).