DEMONISANDO NOS MES HENDENAN E DAÑO TA DESASTROSO PA KÒRSOU SU FUTURO

 

DEMONISANDO NOS MES HENDENAN E DAÑO TA DESASTROSO PA KÒRSOU SU FUTURO

Ku e krísis mundial ku nos komo yunan di Kòrsou ta pasando aden, nos kada un mester sòru pa desplegá un aktitut ku ta produktivo i ku en realidat ta aportá na adelanto di Kòrsou i krea salida realista i sinsero for di nos problemanan. Komo periodista mi a tuma nota di tendensianan maligno pa demonisá miembronan di e komunidat aki den e diskushon tokante e pakete di entrega di 12½ % riba kondishonnan laboral, pero ta komo si fuera prinsipalmente ta trata pa hinka direktornan di empresanan di gobièrnu den un lus sumamente negativo i bati kabesnan di ámtenarnan aden, sin wak mas aleu kiko nos ta hasiendo ku otro. Kòrsou ta un komunidat chikitu i vulnerabel ku nos mester kuida, pasobra ku su bienestar nos tur ta sirbí i no kontrali. Manera ta konosí nos ekonomia i e sirkunstansia finansiero ta konfrontando ku problemanan asina serio ku esaki ta rekerí entrega i sakrifisio èkstra di tur suidadano inkluso esnan ku skouder mas hanchu, esta direktornan di empresanan di gobièrnu. Ya sindikatonan i algun direktor di empresanan di gobièrnu a sinta na mesa i ta trahando konhuntamente riba un trayekto pa atendé e tema aki di un forma hustu i aseptabel. Pronto, esta den 1 à 2 siman lo entregá un pakete na gobièrnu. Investigashonnan ku nos a hasi den nos trabou di periodista a demostrá ku mayoria di e direktornan a duna di konosé di ta preferá pa entrega di e sakrifisio ku nan ta bai hasi, resultá dirèkt den kaha di gobièrnu. 

Tòg ta masha remarkabel ku samsam ku e gritunan dirigí kontra di direktornan di empresanan di gobièrnu, tin un antipatia i rabia kresiente kontra di esnan ku studia i kaba e preparashon akadémiko ku nan a sigui ku éksito ku tantu sakrifisio, pero ku esaki komunidat di Kòrsou tòg ta pèrmití drentamentu di un callejón sin salida, pasobra ta asaltonan dirèkt riba profeshonalismo i kapasitashon. Kòrsou no tin benefisio ku mediokrisidat, emoshonalismo i arbitrariedat, nos mester ke sigui ku esfuersonan pa pone hendenan sufisientemente studiá i kapasitá den puestonan responsabel i eksigente. Anto pa kolmo e resistensia kontra di sueldonan konsiderá haltu serka direktornan di empresanan di gobièrnu i e rabia enorme kontra di hendenan ku a logra kalifiká nan mes i bira eksitoso den e komunidat aki, ta mará na koló, pasobra mas skur e koló di kueru di esun riba kende e krítikanan ta dirigí, mas tenas, devastador i konsistente e krítikanan ei ta. E sirkunstansia aktual na Merka kaminda ta luchando pa establesé kambionan hustu i duradero lòs for di aspektoman rasial, no ta leu for di nos. Den nos komunidat ainda mayoria hende no ta rekonosé tendensianan rasial ku ta bou di superfisie i ku ta manifestá di formanan kamuflá. Hasta hendenan mes ku tin tur e karakteristikanan di hende pretu ta rechasá nan origen. Otro akto inhustu i inkorekto ta esun di generalisá tur empleado públiko i yama nan floho, inkapasitá i korupto. Natural e aparato públiko bou di tur e kambionan ku el a keda someté na dje durante dékadanan ku a pasa, den sentido di kòrta brutu i hopi deskabeyá den e kuerpo aki i prosesonan di ekonomisashon ku a tuma lugá riba sumanan destiná pa (re)kapasitashon, finalmente a kondusí na suak gobièrnu den su totalidat. Mester drecha e aparato públiko di manera ku gobièrnu por ta garantisá di asesoramentu debido i e asistensia profeshonal den e tèrmino rekerí. Pero, no ta korekto i sigur no ta kontribuí na adelanto di Kòrsou tampoko, miéntras nos tur ta pasando momentonan sumamente difísil, kuminsá ku e aktitut di lastra otro abou na suela demonisá otro pa sirbi interesnan ageno. Un Kòrsou debil i suak mas ku klaro ta pone su portanan hanchu habrí pa tur esnan ku ta para lur, esnan ku ta kla pará pa drenta i tuma poder i haña sierto benefisonan den man ku semper nan a kudisiá i anhelá. Nos mester ke ta un komunidat ku ke resolvé su problemanan, pasando den momentonan difísil, pa sali mihó afó, sin sakrifiká e hende lokal ku tin su ‘roots’ aki.

 

Erwin Raphaëla

Bario pa Bario t’esei ta Kòrsou

5223737