Minister di Cultura: COVID 19 a trece cambio den celebracion di Dia di San Juan Lo bay bek pa un fiesta den sabana na cas hunto cu famia

 

Minister di Cultura: COVID 19 a trece cambio den celebracion di Dia di San Juan

Lo bay bek pa un fiesta den sabana na cas hunto cu famia

 

Oranjestad – Minister di Cultura Xiomara Maduro ta informa cu COVID 19 a trece cambio den e celebracion di Dia di San Juan diaranson 24 di juni. E mandatario a enfatisa cu debi cu no por tin aglomeracion di hende no por tin e celebracion den Centro di Bario manera custumbra. Minister Maduro a bisa cu lo bay bek na e manera di celebracion di antes, esta un fiesta den sabana na cas hunto cu famia. Alabes tin un peticion di brandweer pa no cende candela, ya cu esaki ta malo pa nos salud, specialmente awor cu na Aruba tin e situacion di e stof di Sahara.

 

Shon Wantomba y e Fiesta di San Juan 

E dignatario a sigui informa cu Departamento di Cultura (DCA) a prepara un Proyecto Escolar di Dera Gay 2020. E aña aki lo ofrece na tur alumno di e prome klas di scol basico, como ta alumnonan cu a bin di scol preparatorio, e buki titula: Shon Wantomba y e celebracion di Dia di San Juan, un buki di storia di e celebracion di Dia di San Juan. E storia a wordo skirbi pa Edselyn Figaroa y a wordo diseña y ilustra pa Sra. Leidys Ledezma.

Ademas tur scol basico lo ricibi un USB cu e contenido di un film cortico di e buki Shon Wantomba y e celebracion di Dia di San Juan. E scolnan por haci un presentacion pa e scol completo of cada klas por pase pa e muchanan wak. Departamento di Cultura (DCA) lo entrega e buki y USBnan na tur scol basico. Pa mas informacion por tuma contacto cu señora Marlene Lampe na number di telefon: 582-2185.

Programa Special na Television Fiesta di San Juan ‘Dera Gay’

Ministerio di Cultura, UNOCA, Departamento di Cultura y Comision Celebracion di Dianan Nacional hunto cu TeleAruba ta bay presenta un programa di television Fiesta di San Juan ‘Dera Gay’. Esaki lo ta un programa en bibo cu lo wordo pasa diaranson dia 24 di juni, di 6 ‘or di atardi pa 8 ‘or di anochi na canal 23 y canal 42.  Den e programa aki lo trece dilanti con tabata celebra Dia di San Juan antes den sabana di cas cu famia. Lo tin presentacion di banda Tipico, Grupo di Baile, Entrevista, Wega pa medio di pregunta cu e televidente lo por participa y gana premio. 

Minister di Cultura ta invita pueblo en general, specialmente mayornan pa wak e programa aki hunto cu nan yiunan.  Ta importante pa nos muchanan ta bon informa riba e fiesta y tradicion popular di  Fiesta San Juan, Dera Gay cu ta un di e celebracionnan mas popular di herencia cultural di Pais Aruba.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: