Hóbennan ta bai laga nan bos resoná riba “Dia di Emansipashon”
Hóbennan ta bai laga nan bos resoná riba “Dia di Emansipashon”
E proyekto “Hóben Goberná”, ku ta fasilitadó di Parlamento Hubenil di Kòrsou, a uni forsa ku
Plataforma Sklabitut i Herensha di Sklabitut (PSHS), pa riba “Dia di Emansipashon” promé di yüli,
organisá un enkuentro spesial di hóbennan di Kòrsou pa nan mes evaluá kon leu Kòrsou a progresá den
su proseso di emansipashon i laga nan bos resoná.
Hóben Goberná ta un proyekto di Fundashon Bos di Hubentut ku tin komo meta pa duna e hóben e
posibilidat pa partisipá aktivamente na e proseso polítiko na Kòrsou, hasi e hóben konsiente di
desaroyonan riba tereno polítiko, ekonómiko, kultural isosial den nos paisi den mundu i tambe promové
serka e hóben konosementu di struktura i funshonamentu dje proseso polítiko. E proyekto Hóben
Goberná pues ta pa krea hóbennan pro-aktivo,
krítiko i analítiko.
Na okashon di selebrashon di 150 aña abolishon di sklabitut na Kòrsou riba dia 1 di yüli 2013, Gobièrnu
di Kòrsou ofisialmente a proklamá ku kada aña dia 1 di yüli lo ta “Dia di Emansipashon”.
Intenshon ta pa riba e dia aki nos reflekshoná kon leu Kòrsou a progresá den su proseso di
emansipashon. Un reflekshon ku mester ta dirigí riba e desaroyo emansipatorio di Kòrsou, esta riba
futuro di Kòrsou. Pa e motibu aki e proyekto “Hóben Goberná” i Plataforma Sklabitut i Herensha di
Sklabitut” a disidí pa mobilisá hóbennan di Kòrsou pa reflekshoná riba nos presente den kuadro di e
konekshon di nos pasado ku nos presente i muy en partikular nos futuro. E kansion klasiko di Doble R:
“ Tula warda , nos tin hopi kos mas pa drecha” ta sirbi komo inspirashon pa e reflekshon akí i pa laga
bos di hóbennan resoná.
Ta pa e motibu aki e enkuentro spesial aki di hóbennan di Kòrsou lo konkluí ku un resolushon ku un
delegashon di hóben ku a partispá na e enkuentro, lo entregá ofisialmente na presidente di Staten
durante e reunion solèm di Staten riba ‘Dia di bandera”, esta dia 2 di yüli mainta. Intenshon ta pa otro
aña riba dia di Emansipashon lo evaluá a base di e resolushon di aña aki te kon leu Kòrsou a progresá
den su proseso di emansipashon.
E enkuentro spesial di “Dia di Emansipashon” lo tuma lugá riba dia 1 di yüli 2010 di 15.30 pa 17.30
den sala di ICUC na Plasa Brion. Por sigui e enkuentro spesial aki atraves di un transmishon bibu riba
facebook Hóben Goberná.
