Komunikado Kuerpo Polisial Korsou No ta tolerá falta ku òrdu públiko durante di manifestashonNo ta tolerá falta ku òrdu públiko durante di manifestashon
KOMUNIKADO DI PRENSA 249 / 2020
29 yüni 2020
No ta tolerá falta ku òrdu públiko durante di manifestashon
Kuerpo Polisial un bia mas ta rekonosé i respetá e derecho di manifestashon di tur siudadano, grupo òf organisashon, ku ta haña ku ta nesesario ku nan mester sali pa nan derechi.
Miéntras ku esaki ta sosodé di un forma pasífiko, polis ta asta dispuesto na fasilitá e manifestantenan den esaki, debí ku nos tin e deber di kuida i protehá tur siudadano, inkluso esun ku ta manifestá.
Sinembargo, no ta aseptabel ku e manifestashon ta stroba òrdu públiko òf perhudiká sobra di komunidat ku no tin partisipashon i/o envolvimentu den e manifestashon aki.
Tampoko si manifestantenan ta violá regla i leinan dor di kometé echonan kastigabel, kaminda ta sea trese bida i/o salú di hende den peliger òf destruí propiedat públiko òf priva.
Muchu ménos ta permití sakeo, ladronisia, instigashon i otro aktonan kriminal.
Polis bou di ningun sirkunstansia lo tolerá e aktitut aki i lo aktua severo i kaminda ku ta nesesario ku forsa brutu, te na momentu ku e situashon ta bou di kontrol òf e meta pa restablesé òrdu públiko keda lográ.
Kuerpo Polisial tin komo obligashon di sòru pa trankilidat i seguridat den nos komunidat i no ta basilá ningun momentu pa hasi tur momentu tur loke ku ta den su alkanse pa mantené esaki.
