Relashoná ku dia Internashonal di Parlamentonan 30 di yüni 2020 Nashonnan Uni ta haña trabou di Parlamentarionan  esensial pa nos demokrasia

Relashoná ku dia Internashonal di Parlamentonan 30 di yüni 2020

 

Nashonnan Uni ta haña trabou di Parlamentarionan  esensial pa nos demokrasia

Djamars dia 30 di yüni 2020 ta dia internashonal di Parlamento i Parlamentarionan dekretá dor di Nashonnan Uni.  E sistema Parlamentario ta kai den dos kategoria; bo tin paisnan kaminda e sistema Parlamentario ku e representashon di pueblo ta repartí den un Kámara di representantenan (kongreso) i un Kámara di senadornan. Mundu konosé mas ku 46.000 mil miembro di Parlamento. 25 porshento di Parlamentarionan riba mundu ta hende muhé i 28.1 porshento di tur e parlamentarionan riba mundu ta bou di 45 aña di edat. 

 

E ròl importante di Parlamento den e era dje Pandemia Covid-19

Nashonnan Uni  resientemente a rekonosé e balor di e trabou ku Parlamentonan ta desplegando awendia den e era di Covid-19.  E reglanan di normal nobo pa evitá ku e vírùs peligroso aki ta plama ta hasi e trabou di Parlamentarionan mas difísil pero e tareanan importante ku Parlamentarionan tin komo representantenan di pueblo  den gobernashon. Parlamento su tarea di vigilá maneho i kontrolá tur loke Gobièrnu a bin ta hasi durante e Pandemia ta unu importante pa pueblo tin e garantia ku nan interes, ku ta interes di seguridat di salud di nos país, ta ser salbaguardiá debidamente. Nashonnan Uni ta enfatisá ku ta hustamente awó den e tempu aki e trabou di Parlamento ta importante paso tin ku pasa lei i dekretonan, aloká fondonan, kontrolá gobièrnu su trabou na bienestar general dje pueblo. Nashonnan Uni a tuma nota ku ya kaba tin pais ku a hasi kambionan den nan leinan i reglanan di proseder pa Parlamentarionan i staf i personal di otro instanshanan traha for di nan kas asina garantisando ku demokrasia di e institutonan por funshoná saif. 

Inter- Parliamentary Union (IPU)

Ta e organisashon Internashonal di Parlamentonan ku ta fungi komo plataforma pa fasilitá i kordiná dor di kompartí informashon i práktikanan inovativo i eksitoso pa ku e trabou ku Parlamentarionan ta ehersé den representashon di nan pueblo òf komunidat. 

 

Importansia di e fecha 30 di yüni

30 di yüni ta fecha ku Nashonnan Uni a destiná pa anualmente selebrá e dia internashonal di Parlamentonan. Riba e fecha ei Asamblea General di Nashonnan Uni a ratifiká e resolushon A/RES/72/278 kaminda a rekonosé e trabou importante i vital ku Parlamentonan tin den gobernashon i demokrasia pa garantisá transparensia i responsabilidat global. E ta e fecha ku na 1889  a funda e organisashon Inter-Parlamentary Union ( Union Inter Parlamentario) e organisashon riba  nivel mundial ku ta representá Parlamento i Parlamentarionan. 30 di yüni ta selebrá dia dje Parlamentonan  i e sistema i manera ku un Parlamento ta traha pa mehorá bida dje pueblo den e paisnan konserní.  E fecha 30 di yüni segun Nashonnan Uni ta unu kaminda nan ta ferwagt ku Parlamentonan ta reflekshoná riba e manera ku nan komo instituto demokrátiko a bin ta funshoná i kon lo por hasi pa halsa e kalidat di funshonamentu di e Parlamento. 

 

Kontrolá maneho di gobièrnu
Un parlamento fuerte i bon organisá ta esensial pa funshonamentu di demokrasia di un pais. `Miembronan di Parlamento ta representá e  bos dje pueblo, nan ta traha i pasa leinan, nan ta vigilá i kontrolá e trabou dje kolegio ehekutivo ku ta nos konseho di minister i nan maneho na bienestar dje pais. E trabou di Parlamento ta pa garantisá ku gobièrnu su maneho ta benefisiá tur hende ku ta biba riba e isla aki speshalmente esnan mas vulnerabel den nos komunidat. E organisashon UPI esta Inter-Parlamentary Union ta perkurá ku Parlamentonan haña e sosten nesesario pa ku e trabounan komunitario aki.  UPI ta aktivo den paisnan ku ta saliendo for di kualke krísis kousa sea dor di un desaster natural òf dor di kualke konflikto béliko òf Gera.  

Nashonnan Uní i  Parlamentonan
Miembronan di e organisashon di Union Inter Parlamentario di Nashonnan Uni a enkurashá i sostené e labornan di Parlamentarionan rònt mundu pa ku e organisashon di nashonnan Uni. Parlamentonan tin un ròl hopi krusial pa ku Nashonnan Uni pa loke ta trata e atenshon i bos ku nan pueblo su interesnan nashonal por haña riba plano internashonal. kaminda ta trata koperashon riba diferente arianan di desaroyo dje komunidat òf nashon. Nashonnan Uni ta rekonosé e bos i aspirashonnan di Parlamentarionan den funshon pa loke ta trata e vishon i deseo di nan pueblo i nan pais. Pa logra esakinan e organisashon Inter-Parlamentary Union ta hiba un maneho di koperashon internashonal di asistensia na e organisashonnan Parlamentario ku ta rekerí esei. Nashonnan Uni tin atenshon pa tende i sa di tur e aspirashonnan ku Parlamentarionan tin ta vosifera di nan pueblo serka nan. 

Inter-Parlamentary Union UPI ta fungi komo un plataforma pa miembronan di un Parlamento lokal por drenta i tin konteksto ku miembronan di Parlamento na otro Paisnan pa loke ta trata temanan di  integridat i seguridat di nan soberania, desaroyo Sostenibel i pas. 

Meta di Desaroyo Sostenibel number 16
Na 2015 UPI a hunga un papel krusial den e formulashon i apuntamentu di dje metanan di desaroyo Sostenibel di Nashonnan Uni pa loke ta regarda inklushon demokrátiko, desaroyo di e komunidat i pais na un manera ku ta harmonisá e relashon di hende i medio ambiente i trese pas i harmonia. E meta number dies seis ta indiká ku Nashonnan Uni ta pone atenshon pa logra atraves di e trabou ku Parlamentarionan  den nan pais inklushon demokratiko , pas i prosperidat pa e pueblo. Hustisia soshal pa un i un kalidat haltu di demokrasia i funshonamentu di e institutonan ku tin ku perkura pa esaki sosode. 

 

 

Deskripshon dje potrèt; Presidente di Parlamento ku ta deseá tur su koleganan lokal i esnan di Aruba, Sint Maarten i aya na Ulanda un felis dia internashonal di Parlamento i Parlamentarionan awe dia 30 di yüni 2020.