SDKK ta krea oportunidat pa ilegalnan tambe enfoká riba aktividatnan positivo
SDKK ta krea oportunidat pa ilegalnan tambe enfoká riba aktividatnan positivo
Geplaatst op 19 July 2020 dor di Ministerio Hustisia
Willemstad – Den kuadro di e maneho di Minister di Hustisia sr. Quincy Girigorie, Sentro di Detenshon i Korekshon Kòrsou ta krea oportunidatnan balioso pa esnan ku ta detené den e instituto. Esaki ta konta tambe pa esnan ku ta ilegal, paso nan tambe ta hende.
Na e momentunan aki den SDKK tin ilegalnan aloká, ku mayoria biaha a bini Kòrsou en buska di un mihó bida. Mayoria biaha e grupo grandi ta bini riba lancha òf boto. Pa motibunan ya konosí, na e momentunan aki diferente di e personanan ilegal aki no por bai, ni wòrdu manda bèk nan pais.
Tempu a demostrá ku hopi di e hendenan ku ta den e asina yamá ’barak ilegal’ tin hopi talento natural. Es desir ku nan ta kapas di traha algu di nada.
SDKK a bini ta tuma nota ku e personanan ilegal aki tin talentonan artístiko artesanal. Pa yena nan tempu liber mas efektivo i efisiente ku ta posibel i tambe komo konsuelo den e situashon ku nan ta aktualmente, nan ta hasi uso di materialnan ku normalmente lo a wòrdu tirá afó. E materialnan aki, ku por wòrdu yamá, ku rason, materialnan resiklá, nan ta traha diferente arte i ophetonan.
Den kombersashon ku e personanan ilegal aki, SDKK a bin siña komprondé ku den nan pais durante di nan edukashon a pone hopi énfasis riba nan talentonan natural ku den tempu difísil nan lo por hasi uso di esakinan pa nan por proveé kuminda riba mesa pa nan mes i nan famia. Den e situashon ku nan ta aktual, nan ta usa e loke nan a siña na nan pais tambe, pa nan por keda mentalmente fuerte, produsí kosnan kreativo ku ta pone nan sinti nan serka di nan pais, sinti asina e kalor i amor di nan pais i nan famianan ku nan ta leu di dje. Nan ta hasi uso di nan tempu den e barak i ilegal na un manera positivo, dor di hasi kosnan positivo esaki ta evitá ku nan komportashon ta deteroria dor di nan isolamentu.
Riba dje e periodo di Covid 19 a siña nan ku en bèrdat e normal nobo a bini ku mas desafio. I bida a kambia i bini ku hopi mas desafio ku nan mes no por a imaginá nan mes. Siendo den detenshon komo ilegal nan ke duna tòg un aliento positivo na e instituto ku nan talento i obranan ku nan ta produsí.
E bida ku e personanan ilegal aki a pensa ku nan lo por a haña na Kòrsou, tambe a kambia ku e binida di Covid 19. Na lugá di sinta reklamá, strès òf komportá nan mes na un forma inadekuá, nan ta skohe pa kolektivamente nan hasi bon uso di nan tempu. E kòmplimènt, atenshon positivo i palabranan di ku ta enkurashá nan ku nan ta risibí di parti di SDKK ta duna nan forsa, pa los di nan famia i den e tempu aki, keda alegre, ku fe i gradesido ku e trato ku nan ta risibí, siendo den detenshon.
E forma humilde ku e personanan ilegal aki ta sinta kombersá ku otro, traha individualmente riba nan artefaktonan por ta un muestra i ehèmpel pa SDKK kon atendé den tempu difísil ku situashonnan ku a kambia fuera di nos boluntat. E echo ku nan ta kapas di por pasa nan tempu di detenshon di e forma aki, por ta un manera pa habri nos wowo pa futuro maneho. Nan ta konsientisá nos di e potensialnan ku nos tin na Kòrsou, ku nos mes no tin bista pe.
Den tur sosiedat kaminda konsientemente ta traha na desaroyo di un pueblo, diferente instrumentonan di edukashon i formashon mester wòrdu uzá komo fundeshi pa desaroyonan positivo i deseá. Ta p’esei den kuadro di resosialisashon gobièrnu di Kòrsou ta sigui di ta di opinion ku mester duna kada siudadano, mas tantu posibel, e posibilidat pa desaroyá su talento – i abilidatnan natural. Athunto por mira un boto ku un di e personanan ilegal a honra na nòmber di su mama Mari del Carmen.
