Disiplina i kumplimentu ku palabrashon no mester bai ku bientu

 

Disiplina i kumplimentu ku palabrashon no mester bai ku bientu

 

Sinku dia despues ku Sr. Calmes a entregá su karta di retiro na Partido Inovashon Nashonal (PIN), porfín nos pueblo i PIN por a tuma nota di su motivashon pa e kiebro. Durante su konferensha di prensa ku anteriormente a keda kanselá na tres okashon, sr. Calmes a tuma amplio tempu pa spliká, ku komo parlamentario, no opstante ku e ta miembro di un partido polítiko den un koalishon di tres partido, disiplina i kumplimentu ku palabrashon no tin balor. Deporte di ekipo, manera futbòl, definitivamente no ta su kos. Den un ekipo di futbòl, dirigente i hungadónan ta palabrá strategia promé ku wega. Si durante wega un hungadó disidí di skòp bala den gòl di su mes ekipo, e ekipo kontralí ta skor i gana e wega.

Na mei 2017, despues ku PIN a saka un asiento na e elekshon di aprel, sr. Rennox Calmes a forma parti di e ekipo di negosashon di PIN pa a yega na un akuerdo di gobernashon ku e otro partidonan. Sr.Calmes a partisipá na praktikamente tur seshon. Un akuerdo di gobernashon ta reflekshon di e vishon i akshonnan promé ku kuminsá goberná. Mas despues, PIN huntu ku e partidonan PAR i MAN, a firma un protokòl, netamente despues ku partidonan a sinti e nesesidat di tin bon palabrashon kon ta atendé ku otro, ora partidonan tin diferensha di opinion. Den e último aki a palabrá un modelo di eskalashon pa por hiba diskushon, na momentu ku un of mas partido, esta PIN, PAR i MAN no ta di akuerdo ku otro. Den kualke grupo ku ta traha huntu, tambe un koalishon di partidonan polítiko, tipo di palabrashonnan asina ta pa garantisá stabilidat di e relashon, den e kaso aki di e gobièrnu. Den e temporada difísil di krisis aki ta imperativo pa pais por atendé e retonan grandi ku e ta konfrontando.

Direktiva di PIN na algun okashon a mustra sr. Calmes riba e kumplimentu ku palabrashon, tantu den seno di partido, ku ta un ekipo ku sr. Calmes mes a partisipá na su lantamentu, komo den seno di partidonan di koalishon. Sr. Calmes aparentemente tabatin i- mirando su deklarashonnan durante su konferensha di prensa- tin e konvikshon ku kumplimentu ku palabrashonnan hasí i disiplina den ekipo, mester traha lugá pa su punto di bista personal ora ta trata gobernashon di pais. Partido PIN, meskos ku su partnernan di koalishon, mester a tuma nota di puntonan di bista di sr. Calmes den media i durante debatenan den Staten, ku no a keda vosiferá ni den PIN ni den e foro di partidonan trahando huntu, ku ta e asina yama ‘samenwerkende partijen’. Kon por goberná un pais si riba tópikonan di importansia pa pais e mayoria ku ta sostené gobièrnu no por diskutí diferenshanan di opinion i yega na un akuerdo kon pa sigui atende ku e retonan grandi nos dilantí?
Nos a tuma nota di e puntonan ku sr. Calmes kier a palabrá ku partidonan PAR i MAN. Den tur sinseridat, niun di e puntonan aki, no por tabata un problema pa yega na palabrashon den seno di PIN. PIN no ta kere ku e dos otro partidonan tampoko lo a siguí e liña di un solo individuo den koalishon, sr. Calmes, komo sifuera ta e so ta determiná. PIN no ta komprondé tampoko ku e parlamentario independiente tabata ke sostené e gobièrnu, ku netamente e puntonan di krítika ku por sierto ningun ta forma parti di e kartera ku PIN tabatin responsabilidat p’e.

PIN ta mira den e tantisimo hobennan ku na Kòrsou i na nivel internashonal ku ta destaká den deporte, arte, músika i otro disiplinanan ku tin un aktitut di disiplina i kumplimentu ku palabrashon. Esaki na PIN su opinion ta e base pa eksito. Ohalá sr. Calmes haña inspirashon serka un di nan.
Of manera Michael J. Fox a bisa “Discipline is just doing the same thing the right way whether anyone’s watching or not.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: