Ta prohibí pa lubidá ku MFK komo partido den oposishon semper a duna koperashon pa forma quorum den Parlamento

 

Ta prohibí pa lubidá ku MFK komo partido den oposishon semper a duna koperashon pa forma quorum den Parlamento

 

Ku asombro frakshon di MFK a tuma nota di kritiká ku ta sali for di boka di Parlamentarionan ku ta sostené gobiernu debí ku no a logra yega 11 firma pa por habri e reunion públiko di djabièrnè último. Direpente nan kier referí na “Bupo verdracht” i ta kuestioná ku nos demokrasia ta na peliger. Tur e situashon aki a wòrdu krea pa un problema interno den partido PAR i ku awor ta hasi komo si fuera ku ta partidonan den oposishon tin ku solushoná un problema di partido PAR.

 

Dia 27 di ougùstùs 2019 i dia 22 di mei 2020, oposishon a koperá i forma quorum pa señor Schoop i respektivamente señora Mc. William pa Parlamento por a aproba “geloofsbrieven” di e dos personanan aki (mira lista di presensia athunto, tene kuenta ku sr, Schoop su firma ta riba e lista di 27 di ougùstùs, pero su persona a drenta e reunion despues di a huramentá). Ningun di e Parlamentarionan ku awe ta borotá, no tabatin e desensia di yama oposishon danki pa e koperashon aki. 

 

Dia 17 di yüli 2020, ora tabata turno pa señora Alcala Walle drenta, MFK tabata den sala i nos miembro di Parlamento señor Doran a forma parti di e komishon pa aprobá kredensialnan, pero partido PAR a uza su influensia manera semper nan ta hasi, pa evitá ku señora Alcala-Walle por a drenta Parlamento. Asina krea e situashon di krísis ku nos ta aden awe, pero na spañó tin un dicho ku ta bisa “El que mal obra, mal le va”.

 

Ya pa basta aña oposishon, sigur den Parlamento ta funshonando den un régimen diktatorial, kaminda presidentenan di Parlamento di turno ta trapa riba derechi di oposishon i te hasta ta violá Reglamento di Orden ku e solo meta pa sera oposishon su boka. Un gobiernu i un mayoria den Parlamento ku ta trapa riba derechinan di oposishon no ta digno pa goberná un pais demokrátiko, debí ku nan no ta komprondé e konsepto di demokrasia.

 

Kon por ta posibel ku partidonan den oposishon tin ku warda 100, 200 te hasta 300 dia pa presidente di Parlamento konvoká reunion ku oposishon pidi, riba temanan di interes pa Kòrsou. Esaki ta un violashon, sin mas di Reglamento di Orden di Parlamento.

 

“In dictatoriale regimes wordt oppositie als onwettig gezien en daarom dikwijls onderdrukt (loke ta sosodiendo awor aki, ku partidonan den oposishon), terwijl oppositie in een democratie deel van het overheidsprincipe uitmaakt (loke partidonan ku ta forma koalishon no ta komprondé)”

 

Aparte di ku e partidonan ku ta forma koalishon ta trapa riba derechinan di oposishon, partidonan ku ta sostené koalishon no ta hasi nan trabou di kontrolá gobiernu den su funshonamentu. CFT i polítikonan Hulandes na mas ku un okashon a trese esaki dilanti, awe mas ku 500 mama i tata di famia ta na kas, pa motibu ku Parlamentarionan ku ta sostené koalishon a aprobá un dil ku Refineria di Kòrsou/PMO a sera ku grupo Klesch, sin ku nunka Parlamento a mira e kontrakt.

 

Awe e konsekuensia di e aprobashon di e mal dil aki ta wòrdu karga pa esnan ku a keda sin un entrada pa kria nan famia.

 

Refineria di Kòrsou a gasta alrededor di 30 mion pa buska un operadó pa nos refineria i esaki tabata un frakaso total i Kòrsou i trahadónan di refineria a sali gran pèrdèdónan. Direktor interino di Refineria Kòrsou ta deklará ku ta bai start e trayekto di nobo pa buska un operador, ningun di e Parlamentarionan ku ta sostené gobiernu no a sali i kuestioná e echo ku e mesun hendenan ku a dispidí 30 mion i a frakasá den nan intento pa haña un operador ta bai hasi e trabou atrobe. Parlamentarionan ku ta sostené gobiernu i ku tin komo tarea pa kontrolá gobiernu ta “muisstil”, nan no tin kunes.

 

Esaki ta djis algun di e motibunan, dikon frakshon di MFK lo no koperá pa forma quorum pa asina habri e reunion di djaluna awor. No lubidá ku frakshon di MFK na mas ku un okashon a kontribuí pa forma quorum pa reunion nan por tuma lugá.

 

Pero miéntras ku aktitut di gabinete Rhuggenaath i e Parlamentarionan ku ta sostené gobièrnu i prinsipalmente presidente di Parlamento no kambia i duna oposishon e rèspèt ku oposishon meresé den nos demokrasia, frakshon di MFK lo aktua igual ku bosnan i lo no duna koalishon ningun kontribushon mas.

 

Frakshon di MFK ta skucha bos di pueblo, “Vox Populi, Vox Dei” (Bos di pueblo ta bos di Dios). 

 

Pueblo di Kòrsou ta fada ku e gobernashon di Gabinete Rhuggenaath, ku a hiba nos tur na Kòrsou den e buraku di mas hundu i skur ku historia di Kòrsou a konosé.

 

Gilmar “Pik” Pisas

Lider di Frakshon

Frakshon di MFK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: