Subida di preis riba kombustibel pa sigui garantisá suministro lokal

Subida di preis riba kombustibel pa sigui garantisá suministro lokal

Geplaatst op 30 July 2020 dor di Ministerio Desaroyo Ekonómiko

WILLEMSTAD – Durante último reunion di Konseho di Minister, Gobièrnu di Kòrsou a tuma desishon riba adaptashon di preis di kombustibel. Desishon di esaki a keda tumá basá riba un kálkulo di e gastunan nesesario pa por sigui garantisá suministro lokal di kombustibel, presentá pa Bureau Telecommunicatie & Post (BT&P). A base di esaki, Gobièrnu ta bai introdusí un subida di preis riba diferente produkto di kombustibel pa konsumo lokal, ku lo drenta na vigor entrante 4 di ougùstùs 2020.

For di komienso di e aña aki, Ministerio di Desaroyo Ekonómiko ku ta enkargá ku e sektor energétiko, a presentá un plan di kontingensha ku mester garantisá suministro di kombustibel pa konsumo lokal despues ku refineria a stòp di prosesá petroli. E plan ta enserá un kalkulashon di gastunan di operashon di algun kompleho di refineria pa un temporada di 6 luna, kual ta e periodo ku a premirá ku e refineria lo bai ta inaktivo en espera di un operadó nobo. Esaki a resultá den introdukshon di un rekargo riba preis di kombusitibel ku a tuma lugá na februari 2020. Miéntras ku ta sigui hasi esfuerso pa yega na un operadó nobo, Gobièrnu di Kòrsou tin e responsabilidat pa kontinuá ku e plan di kontingensha pa garantisá suministro lokal te na momento ku e refineria bira kompletamente operashonal atrobe.

Minister di Desaroyo Ekonómiko, sr. Steven Martina, ta indiká ku e ta konsiente ku e subida aki lo tin un impakto riba bida diario di komunidat di Kòrsou i sigur den e tempunan difísil aki. Sinembargo, e desishon pa bai subi preis levemente di kombustibel no a keda hasí sin mas. E ta basá riba kalkulashonnan eksakto, teniendo na kuenta e gastunan relatá na kontinuashon di e plan di kontingensha. Tur esfuerso ku ta ser hasí, ta pa garantisá suministro di gasolin, gas i demas produktonan petrolero i konsekuentemente garantisá funshonamentu di nos pais. Gobièrnu di Kòrsou ta sigui traha di forma diligente riba opshonnan pa minimalisá gastunan relatá na garantisá suminstro di kombustibel na komunidat.

Den e periodo benidero Bureau Telecommunicatie en Post lo publiká e tarifanan nobo riba e diferente produktonan petrolero i tambe di awa i koriente. Komunidat por tuma nota di e tarifanan aki den korantnan lokal òf dor di bishitá wèpsait di  BT&P, http://www.btnp.org.

Pa un bista general di e adaptashonnan di preis:

Lista di preis di kombustibel entrante 4 di ougùstùs 2020

Lista di preis pa awa i koriente entrante 4 di ougùstùs 2020

 

FIN di komunikado
__

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: