Lusnan di tráfiko riba Schottegatweg Nort ta den funshon atrobe.

 

Lusnan di tráfiko riba Schottegatweg Nort ta den funshon atrobe.

Geplaatst op 10 August 2020 dor di Ministerio Tráfiko, Transporte i Planifikashon Urbano

Willemstad – Ministerio di Tráfiko, Transporte i Planifikashon Urbano (VVRP) huntu ku Servisio pa Obra Públiko (OW) ta anunsiá ku e lusnan di tráfiko riba Schottegatweg Nort ta den funshon atrobe. Debí na un interupshon konstatá den e kabelnan, e lusnan na krusada Beatrixlaan/ Aztekenweg si ainda no ta funshonando normal.

Manera ta konosí, pa algun siman kaba e lusnan di tráfiko na e krusada di Schottegatweg Nort kuminsando for di Winston Churchillweg te na Kaya Coco Balentin tabata for di servisio. Mester a bestèl e piesa for di eksterior i regla asuntunan finansiero ku entretantu a keda kla.

Awe por bisa ku e lusnan di tráfiko riba e kaminda ariba menshoná ta den funshon atrobe. Ta lamentabel ku e lusnan na e krusada entre Beatrixlaan/ Aztekenweg, ainda no por funshoná manera mester ta, komo ku aparte di piesa ku tabata falta a konstatá awe ku tin tambe un interupshon den e kabel. Entretantu e kompania DCG ku ta enkargá ku e trabounan a indiká di a lokalisá e interupshon aki i lo traha pa remediá esaki mas lihé posibel. Na e momentunan aki e lusnan na e krusada ta funshoná di forma temporal i ora ku ta trahando riba e interupshon lo bolbe saka e lusnan aki for di servisio pa por realisá e trabounan di pone un kabel nobo.

Ta spera ku hopi lihé por kaba e trabounan aki di moda ku e lusnan por ta bèk den servisio. Debí na e situashon imprevisto aki, ta pidi outomobilistanan pa tene kuenta ku e lusnan di tráfiko riba e krusada entre Beatrixlaan/ Aztekenweg por ta for di servisio i pa kore ku koutela.

Minister di Tráfiko, Transporte i Planifikashon Urbano, Zita Jesus-Leito ta gradisí komunidat di Kòrsou pa e pasenshi durante e dianan ku e lusnan di tráfiko riba Schottegatweg Nort tabata for di servisio, i ta hasi un apelashon pa nos ban trankil den tráfiko.