150 Kursista a partisipá na kursonan di IPE relatá na Lès di Skol Virtual i Agrikultura Modèrno

 

150 Kursista a partisipá na kursonan di IPE relatá na Lès di Skol Virtual i Agrikultura Modèrno

 

Willemstad, 20 di yüni 2020 – Institute for Professional Excellence (IPE), den su afan pa prepará gruponan grandi den nos komunidat pa e trabounan práktiko ku ta presentando nan mes den futuro pa medio di kurso grátis, training i sosten, a konkluí e di dos fase pa e aña aki ku 150 kursista ku a sigui (un di e) kursonan den sea duna lès ku medionan virtual i e kurso di agrikultura modèrno pa medio di e sistema hidroponia. Durante e evento di otorgashon di sertifikado ‘drive-thru’ ku outo, e kursistanan a selebrá nan logro i lo sigui tuma paso den e areanan aki kual lo ta benefisioso tantu pa nan mes, komo pa Kòrsou.

 

Na inisio di e seremonia a hiba palabra Minister Eugène Rhuggenaath enkargá ku e Ministerio di Siensia, Enseñansa, Kultura i Deporte, Minister Zita Jesus-Leito enkargá ku e Ministerio di Salubridat Públiko, Medio Ambiente i Naturalesa, i representantenan di hunta di Institute for Professional Excellence.

Hidroponia

IPE a ofresé e kursistanan ku interes den agrikultura modèrno e oportunidat pa sigui e kurso grátis, kual ta konsistí di un parti teorétiko ofresé den kolaborashon estrecho ku e fakultat di ‘Food and Agriculture’ di ‘University of the West Indies’ (UWI) situá na Trinidad & Tobago i un parti práktiko ku ta tuma lugá na Nos Kunuku kaminda ya ta hasi uso di entre otro hidroponia, un di e métodonan modèrno pa kultiva. Usando e sistema di hidroponia bo por kultivá kosecha den areanan limitá pa espasio òf espasionan será, usando sistema i ekiponan modèrno pa elevá efisiensia i protehé plantashon. Alabes lo sostené e kursistanan pa por realisá nan mes negoshi dor di duna konseho i training relatá na maneho, finansas, merkadeo, i hopi mas.

Online Teaching

E kursistanan ku a partisipá na e kurso ‘Online Teaching’ a yega na e training pa medio di kolaborashon entre IPE, Departamentu di Enseñansa i direktivanan di skolnan. E maestro a haña un introdukshon na un sistema interaktivo di duna lès virtual komo medio, i no solamente komo instrumento. Durante e lock-down kousá pa e pandemia di COVID-19 ya por a eksperensiá e posibilidatnan di dunamentu di lès virtual for di un lugá remoto. Pero manera por mira den eksterior, Online Teaching ta ofresé muchu más oportunidat ku esaki so. Pensa entre otro na invitá ekspertonan riba materianan spesífiko ku riba un manera interaktivo por bira parti di e kuríkulo via plataforma online, aksesibel pa tur studiante na tur skol. Òf mayor ku por sigui e materia ku e yu ta siñando den klas. E inisiativa pa ofresé e kurso ta dirigí na krea un fundeshi ku ta parti di henter un kadena pa hiba enseñansa na e siguiente plano, mientras ta garantisá un impakto riba e hóben durante lès. E meta ta ku maestronan ku a sigui e kurso ta traspasá e informashon i métodonan den nan seno na skol. Mientras tantu e partnernan den e proyekto aki ta sigui kolaborá pa desaroyá e infrastruktura nesesario pa yega na un resultado efektivo kaminda e alumno ta sentral.

 

IPE ta kargá pa Bureau Telecommunicatie en Post, Aqualectra, SOAB i CHATA. IPE tin komo motivashon pa kontribuí na rekapasitashon di e forsa laboral di Kòrsou. Pa loke ta ambos kurso, por a nota e balor agregá durante e pandemia. Ta notabel ku Aruba ya a tuma kontakto ku Kòrsou pa nan tambe realisá un inisiativa similar. Resientemente IPE a bolbe start un kurso pa 50 persona desempleá desaroyá nan mes den  agrikultura modèrno.


Pa mas informashon: ipe.cw

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: