SOAW ta bai reanudá aseptashon di petishon pa vakatura di pèrmit di trabou
SOAW ta bai reanudá aseptashon di petishon pa vakatura di pèrmit di trabou
Geplaatst op 22 August 2020 dor di Ministerio Desaroyo Sosial, Labor i Bienestar
Mester yama 724 5300 i pidi un sita pa entregá petishon pa vakatura di trabou
Willemstad – Djaluna 24 di ougùstùs 2020 Ministerio di Desaroyo Sosial, Labor & Bienestar (SOAW) ta reanudá aseptashon di petishonnan di vakatura di trabou pa ekstranhero atrobe. SOAW lo tuma 2 tipo di petishon den tratamentu. 1. Ekstenshon di pèrmit di trabou. Esaki ta pa instansianan ku tin un pèrmit ku tei kaduká i ke pidi pa alargá/ekstendé e pèrmit di trabou ku nan a haña pa empleá un ekstranhero. 2. Petishonnan pa ekstranheronan pa kual un kompania o persona natural ta hasí petishon pa di promé biaha.
Entrante djaluna 24 di ougùstùs 2020 lo inisiá aplikashon di e moratorio ku pronto lo keda anunsiá pa medio di un dekreto ministerial. SOAW ke pone na konosementu di públiko ku, teniendo kuenta ku e restrikshonnan ku tin ankrá den e moratorio, lo no aseptá petishonnan pa pèrmitnan di trabou pa e ekstranhero pa ehersé funshonnan definí den e moratorio. Konforme e moratorio, lo no otorgá pèrmit pa fushonnan manera bendedó, personal di tienda i pakus, sakadó di slá, karpinté, sirbidó di kuminda i bibida, limpiadó, yenadó di rèki, personal pa atministrashon ku nivel di preparashon abou, obrero ku nivel di preparashon abou, mèslá, personal pa traha den mangasina etc. Kòrsou tin un desempleo hopi grandi i SOAW tin diferente buskadó di trabou registrá ku por ehersé e funshonnan menshoná den e moratorio.
Reglanan vigente pa limitá transmishon di Covid-19 ta pone ku Sektor di Labor ta aseptá entrega di petishonnan pa vakatura riba sita pa evitá aglomerashon grandi di persona den e edifisio. Mester yama 724 5300, skohe Sektor di Labor i pidi pa un sita pa entregá vakatura pa petishon di pèrmit pa trabou pa promé biaha o pa prolongashon di pèrmit ku ta bai vense.
Sektor di Labor ta informá tambe ku ta rekomendabel pa ora públiko ta bishitá nos ofisina, e bishitante sigui instrukshonnan duná dor di personal di seguridat i hasi uso di protekshon di boka (mondkapje) pa su mes protekshon i protekshon di nos personal.