Medidanan pa ku atendementu ku públiko na wardanan di polis.
KOMUNIKADO DI PRENSA 331 / 2020
28 ougùstùs 2020
Medidanan pa ku atendementu ku públiko na wardanan di polis.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ
Relashoná ku e situashon di Covid-19 i den kuadro di medidanan ku gobièrnu a i ta
tumando pa minimalisá e riesgo di kontaminashon, Kuerpo Polisial tambe ta tuma algun
medida pa ku klientenan ku ta bishita wardanan di polis.
E proseso di hasi denunsia ta tuma lugá mas tantu posibel di forma digital. Pues e
denunsiante ta pone su deklarashon riba papel i ta mail esaki pa e warda di polis di mas
serka di unda e ta biba. Ta importante pa e denunsiante nota su nòmber kompletu i su
number di telefòn den e mail.
Denter di un periodo kòrtiku, e denunsiante lo risibí un yamada pa un sita pa kaba di
formalisá i firma e denunsia.
Den kaso ku e denunsiante no por mail su denunsia, e por yama e warda di polis pa traha
un sita pa bin hasi e denunsia personalmente na warda.
Ta importante pa e denunsiante bini riba e dia i orario ku el a haña sita pa bin hasi e
denunsia.
Den kaso di urgensia, e denunsiante por yega na un warda di polis pa hasi denunsia. Den e
kaso ei mester keda tene kuenta ku reglanan stipulá manera e.o. e kantidat di hende ku na
mes momentu ta ser permití den e sala di espera, aplikashon di distansia sosial i tambe
medidanan di higiena.
Email adrès i number di telefòn di e wardanan di polis:
Warda di polis Montaña : warda.montana@polis.cw 8666700
Warda di polis Rio Canario : warda.rio@polis.cw 8666800
Warda di polis Punda : warda.punda@polis.cw 8666300
Warda di polis Otrabanda : warda.otrabanda@polis.cw 8666400
Warda di polis Barber : warda.barber@polis.cw 8666900
Pa personanan ku ta bishita wardanan di polis, no ta permití mas ku 3 persona den e
salanan di espera na mes momentu.
E medidanan aki lo drenta na vigor entrante di djaluna 31 di ougùstùs 2020.
Kuerpo Polisial ta supliká un i tur pa tuma bon nota di esaki i ta gradisí pa e komprenshon.
Laga nos tur huntu koperá, pa mas pronto posibel sali for di e situashon aki.