Petishon pa reunion públiko riba e intenshon di gobiernu di Hulanda pa imponé un lei di konsenso i tambe pa bin ku un entidat pa ehersé algun trabou na Kòrsou ku ta kontra di nos leinan eksistente

 

Willemstad, 31 di ougùstùs 2020

 

Na: Presidente di Parlamento
Señora A. Pauletta
Wilhelminaplein 4
Presente

Tópiko: Petishon pa reunion públiko riba e intenshon di gobiernu di Hulanda pa imponé un lei di konsenso i tambe pa bin ku un entidat pa ehersé algun trabou na Kòrsou ku ta kontra di nos leinan eksistente

 

Señora Presidente,

 

Suskritonan, miembronan di e frakshon di MFK den Parlamento, ta aserka bo persona ku e petishon, pa un reunion públiko konforme artíkulo 64 insiso 4 di Reglamento di Orden ku e punto di agènda ariba menshoná.

 

Pueblo di Kòrsou den diferente forma a bin ta ekspresá desaprobashon pa e forma kon gabinete Rhuggenaath a bin ta goberná Kòrsou. Konsekuensia di e maneho desastroso aki ta ku awe gobiernu Hulandes kier imponé riba pueblo di Kòrsou un “rijkswet” mas, pero tambe un entidat ku nan a yama “Caribisch Hervormings Entiteit” (CHE).

 

Frakshon di MFK ta haña ku ta hopi importante pa Parlamento debatí riba e proposishon i intenshon aki di gobiernu Hulandes. Kaminda kier uza e situashon ku mundu ta pasando aden relashoná ku COVID-19 pa imponé medida riba pueblo di Kòrsou.

 

Pa asina Parlamento di Kòrsou, duna gabinete Rhuggenaath un mandato kla pa medio di un moshon kon pa atendé ku e pakete di medida aki.

 

Suskritonan kier pidi Presidente di Parlamento pa invitá Kòrsou su “Opperbevelhebber”, Minister Presidente Eugene Rhuggenaath, pa ta presente pa asina Parlamento debatí ku Minister riba e pakete presentá pa Hulanda.

 

Atentamente,

Gilmar Pisas

Charles Coope

Jacinta Constancia

Gilbert Doran

Juniël Carolina