Reglanan di okupashon ta konta pa botikanan tambe

 

Reglanan di okupashon ta konta pa botikanan tambe

Geplaatst op 02 September 2020

WILLEMSTAD- Resientemente Gobièrnu di Kòrsou a kompartí reglanan vigente pa mantenshon di higiena i distansia sosial den entre otro establesimentunan manera supermerkado, restorant i kasnan di kuido. Sinembargo, mirando práktika, ta importante pa reiterá ku regla i rekomendashonnan similar ta sirbi pa protekshon di nos kada un i pa konhuntamente trata na mantené e kontagionan aktual di COVID-19 na un mínimo. Komo tal, e reglanan aki ta konta tambe pa tur establesimentu komersial, inkluso botikanan na Kòrsou.

Meskos ku ta konta pa otro establesimentunan komersial, botikanan tambe lo mester atené nan mes na instrukshonnan gubernamental pa loke ta trata higiena i distansia sosial. Esaki ainda mas, teniendo kuenta ku sektor botikario ta trata prinsipalmente ku personanan posiblemente vulnerabel ku ya tin un òf otro kebrante di salú i ku mester di remedi pa por trata esaki. Instrukshon pa botikanan tambe ta indiká ku e espasio di e establesimentu mag di ta okupá te ku un máksimo di 50% di su kapasidat total, teniendo kuenta ku e kantidat por varia dependiendo e espasio den kada botika.

Gobièrnu di Kòrsou ta konsiente ku esaki por trese un situashon difikultoso kaminda personanan ku ta kebrante di salú kisas lo mester warda pafó di e botika pa por keda atendé, mirando ku esaki a alkansá e máksimo di su okupashon. Un sugerensia i/òf rekomendashon ku por yuda den un situashon semehante lo ta pa e persona ku ta malu, te kaminda esaki ta posibel, laga un famia, amigu òf konosí tuma e remedi(nan) na botika.

 

Aparte di esaki, durante periodo di Toke de Keda hopi botika na Kòrsou a inová ofresiendo e servisio na su kliente pa manda nan resèpt di forma digital. Avansenan similar den dunamentu di servisio ta kompletamente di aploudí i kisas ta un idea pa duna kontinuashon na esaki, mirando ku e por ta un solushon práktiko den e situashon aktual ku por ta di benefisio tantu pa e kliente komo tambe pa e botika mes.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: