Hóben Goberná ta habri temporada di reklutashon pa hóbennan entre 15 i 21 aña

 

Hóben Goberná ta habri temporada di reklutashon pa hóbennan entre 15 i 21 aña

Willemstad – E proyekto “Hóben Goberná”, ku ta fasilitadó di Parlamento Hubenil di Kòrsou a drenta
den e periodo di reklutashon i preparashon pa ku elekshon di e Parlamento Hubenil ku mester di tuma
asiento na aña 2022, i ta habri oportunidat pa hóbennan por inskribí i kuminsa ku e parti di formashon.
Hóben Goberná ta un proyekto di formashon di hóben riba e área di liderazgo, gobernashon i politiká. Tur
partisipante na e proyekto aki ta hóben entre 14 pa 21 aña ku ta pasa den e proseso di elekshon pa forma
parti di e Parlamento Hubenil i ta pasa den un proseso di formashon durante 2 aña di tempu. Durante e
periodo di 2 aña akí, miembronan ta haña preparashon riba diferente área di politika, gobernashon, liderazgo
i formashon di karakter pa medio di trabou den tim, etiketa, spich i hopi mas. Tur esaki ta pa yuda forma
un hóben i prepará nan pa ta lidernan den e área gubernamental i tambe ta brinda un bon base pa tur tipo di
trabou ku e hóben ta aspirá pa den futuro.
Aparte di esakinan, miembronan ku ta forma parti di e Parlamento Hubenil tin kontakto i interkambio
regular ku e diferente Parlamento Hubenil di den region i tambe diferente organisashon internashonal.
Tambe nos miembronan ta haña oportunidat pa hasi bishita di trabou na otro paisnan, manera nos exmiembronan Joshting Streden i Kevin Eustatia ku tabatin asiento den e último Parlamento Hubenil i ku a
kedá selektá pa Rotary Club of Curaçao pa a bishitá Trinidad & Tobago kaminda nan a partisipá na Model
United Nations (MUN), kual ta un konsepto kaminda partisipantenan ta simulá Nashonnan Uní.
Pues Hóben Goberná tin komo meta pa duna e hóben e posibilidat pa partisipá aktivamente i hasi e hóben
konsiente di e proseso politiko na Kòrsou, ekonómiko, kultural i sosial den nos pais i den mundu i tambe
promové serka e hóben konosementu di struktura i funshonamentu di e proseso gubernamental.
Pues abo hóben ku semper tabata ke a forma parti di e Parlamento Hubenil, bo ta entre 15 i 21 aña di edad,
ta inskribٕí na registro sivil i tin e nashonalidat Hulandes i lo ta disponibel pa partisipá durante 2 aña den
Hóben Goberná, esaki ta e oportunidat.
Pa mas informashon i inskripshon por email nos na hobengoberna@bosdihhubentut.com, òf por manda nos
un mensahe via di nos pagina di Facebook @Hóben Goberná òf por yama nos na 461 8103 òf 462 2442.
Hóben, no pèrdè e oportunidat akí pa forma parti di e Parlamento Hubenil – Hóben Goberná, pa komo
representante di hóbennan kana e kaminda di komunikashon, informashon i bienestar general pa e hubentut
di Kòrsou.

This site uses Akismet to reduce spam. Learn how your comment data is processed.

error: Content is protected !!
%d bloggers like this: