Situashon den farándula aki na Kòrsou, ta alarmante.

 

Situashon den farándula aki na Kòrsou, ta alarmante.

 

WILLEMSTAD – Durante último dianan,  Direktiva di AMAK, ta risibiendo masha hopi yamada i “whatsapp”, for di diferente gremio den farándula aki na Kòrsou, manera,  dj-nan, trahadónan den restorant , kafé, hotèl, promotornan doñonan di empresanan di horeca, i músikonan di tur  género, pa ban uni forsa, pa tene un manifestashon grandi..

 

Direktiva di Amak a manda 2 karta, pa Minister Presidènt Eugene Rhuggenaath ku kopia pa Ministernan di Ekonomia i Hustisia, pa ban sinta na mesa i huntu deliberá, kon por yega na alternativanan, pa gradualmente e sektor farandulero por kuminsá funshoná. E situashon difísil reinante, ta tumando lugá for di medio Mart 2020, kaminda Gobièrnu a tuma medidanan ku a pone  farándula  a keda kompletamente paralisá.

 

Algun artista , ku a bin na remarke pa un kompensashon finansiero, no por kubri nan gastunan di Aqualectra, kompra den supermerkado, paga nan hipotek i otro debenan mensual. E situashon aki ta kreando  hopi tenshon den nan seno familiar.

 

Direktiva di Amak ta tuma nota tambe, ku e tim di kòntròl, no ta hasi e tarea den un formanan ophetivo.

 

Tin diferente establesimentu ku ta keda  pèrmití   pa vários siman tin aglomerashon i no kumplimentu ku reglanan di higiena, miéntras tur atenshon ta ser konsentrá riba Mini Marketnan. Es mas a duna pèrmit na un aktividat pa tuma lugá den espasio aire-kondishoná, miéntras ta mantené nos klupnan di nokturno será.

 

Amak no ta kontra di e sitionan menshoná, pero eksepshonnan mester ta riba un base igual pa tur establesimento.

 

Muzik ta algu masha esensial den bida di e ser humano, i ta p’esei, na paisnan, ku tin un situashon di Covid, muchu mas severo ku na Kòrsou, ta krea alternativa, ku por tin muzik bibu, bou di kondishon, ku e muzik ta keda separá, pa un plachi di plèstik.

 

Pa direktiva tambe, salubridat ta bin na promé lugá, pero mester buska e balanse den un forma ophetivo, pa e sektor farandulero tambe por sobrebibí.

 

Direktiva di Amak i e komishon na Interes di farándula (KIF), ta en espera di un reakshon di parti Gobièrnu pa un reunion pa mas tardá djarason 7 di òktober 2020 pa  5 or di atardi.

 

Dado kaso no tin reakshon di parti nos gobernantenan, tur ku ta metí den farándula aki na Kòrsou, manera,  dj-nan, trahadónan den restorant , kafé, hotèl, promotornan doñonan di empresanan di horeca, i músikonan di tur  género, lo uni forsa, pa tene un manifestashon di protesta di tur gremio farandulero,  pa trese nan inkietutnan dilanti..

 

Direktiva di Amak ta di opinion, ku meskos  ku  Minister Girigorie, a demostrá komprenshon i madures, ku farándula aki na Kòrsou, por a bolbe habri 19 di yüni último, awor aki esnan ku tin ku tuma desishon, tin ku demostrá komprenshon pa e situashon aktual, pa bida nokturno, por kuminsá funshoná, den un forma responsabel , mas pronto posibel.

 

Na nòmber di direktiva di AMAK

 

Manfred Feko Gomes                                            Giovanni Atalita

Presidente     Sekretario

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: