Deklarashon di Promé Minister riba e último desaroyonan entre Kòrsou i Ulanda

Deklarashon di Promé Minister riba e último desaroyonan entre Kòrsou i Ulanda

Geplaatst op 11 October 2020 dor di Ministerio Asuntunan General i Promé Minister

Pueblo di Kòrsou,

Awe ta tokami un biaha mas pa informá bo tokante di progreso di e kombersashonnan ku nos a hiba ku Hulanda, pa yega na un akuerdo pa finansiamentu i kolaborashon duradero i tambe sosten di Parlamento di Kòrsou pa por logra éksito den esaki.

Ken por a imaginá ku hustamente riba un dia tan históriko manera 10 di òktober 2020 – kaminda Kòrsou a kumpli 10 aña di su outonomia den Reino Hulandes – nos Parlamento a aprobá un moshon pa sostené e akuerdo aki. Un momento di sumo importansia pa Kòrsou, ku ta kulminá e vários retonan ku nos komo pais mester a dil kuné den transkurso di añanan, pero alabes e vários logronan ku nos ta selebrá tambe.

Despues di un periodo largu di negosiashon kontinuo i intensivo, Gobièrnu di Kòrsou a logra yega na proposishonnan adaptá den “un entidat di reforma i desaroyo”, kaminda ta tene kuenta ku posibilidatnan pa rekuperashon duradero di Kòrsou i konstrukshon di un mihó bienestar i desaroyo pa kada siudadano di Kòrsou.

Nos ta na un krusada kaminda hopi oportunidat nobo ta bai keda kreá pa nos transformá nos pais. Ku nos komprometé nos mes,  aki 10 òf 20 aña ainda nos ta sinti e efektonan positivo di e transformashon. Banda di reforma, awor nos tin perspektiva tambe di invershon den nos ekonomia, desaroyo sosial di nos pais, kuido di kalidat, sistema di impuesto, alsa efisiensia i efektividat di sektor públiko i tambe modernisá nos sistema di enseñansa.

Mi a sali Parlamento, kaminda ami i mi kolega Minister Steven Martina a informá i debatí tokante di e lei di Reino, e órgano di reforma i desaroyo i tambe e pakete di reforma i invershon.

Pero promé ku por a hasi esaki, nos komo Gobièrnu mester a kana un kaminda largu i tenás di negosashon ku Hulanda riba e oferta i posishon ku nan a presentá. Si boso ta kòrda, for di un promé instante a bisa ku únikamente sintá na mesa, i komprondiendo otro, nos por logra avansenan na bienestar di nos pueblo.

Kòrsou su enfoke awor ta riba UN ETAPA NOBO. Ta na nos pa awor i semper, tin nos destino den nos mes man! Esaki ta nos chèns pa berdaderamente kuminsá karga nos outonomia manera debe ser atraves di propio eskoho i aktuando riba nos propio forsa.

Pero kiko ta nifiká “UN ETAPA NOBO”?

Nos tin ku ban reformá huntu pa trese kambio real. Pero e kambio aki nunka no ta yega si ABO, AMI i NOS KADA UN no asumí nos responsabilidat pa realisá e reforma i invershonnan ku tantu mester tuma lugá. Pa logra esaki a sali negoshá konkretamente pa:

  1. Invertí den nos hendenan. Ta trata aki di e.o. kreashon di un mihó konekshon entre enseñansa i nos sektor laboral, kaminda e chèns pa hende kaba skol i haña trabou ta bira aun mas grandi, pero tambe invershon den material i otro rekursonan pa enseñansa. Un bon ehèmpel ta e montante di 60 mion florin komo donashon ku ta bai haña pa hinka den enseñansa mésora.
  2. Negoshá ku Hulanda pa aparte di reformá, nos invertí prinsipalmente den e área sosial i ekonómiko. Ke men no ta papia mas di Caribisch Hervormingsentiteit, pero awor por papia di un órgano ku ta hasi tantu reforma komo desaroyo sosial i ekonómiko di Kòrsou.
  3. E órgano di reforma i desaroyo lo konsistí tambe di por lo ménos un (1) persona ku afinidat pa nos realidat i ku ta aktua den konsultá ku nos Gobièrnu.
  4. Nos outonomia no ta keda miná. A sòru pa e lei di konseso no ta para den nos kaminda demokrátiko. Gobièrnu di Kòrsou, pero sigur Parlamento su ròl ta keda respetá.
  5. Ta trata di un lei di Reino ku durashon di 6 aña total. Una bes e 6 aña aki pasa, outomátikamente e lei ta tèrminá. Ke men no tin mester di yega na un konsenso pa chèk si esaki por tèrminá òf no. A logra si pa añadí un evaluáshon aki 3 aña pa wak kon ta bayendo.
  6. Pa por bin na remarke pa e fondonan nesesario, nos mester yega na un agènda di ehekushon i finalmente e ehekushon ta keda den nos mes man trahando huntu ku e órgano di reforma i desaroyo. Esaki semper ta keda presentá na Parlamento di Kòrsou promé ku e keda ehekutá.
  7. E reto di likides ta keda atendé una bes firma un akuerdo polítiko i kumpli ku e eksigensianan akordá.

Promé ku yega na un akuerdo definitivo riba e lei di Reino, e totalidat ta keda presentá na ‘Raad van State’ pa su punto di bista. Aki tambe nos lo entregá pregunta i puntonan aklaratorio pa garantisá ku Kòrsou su interes ta keda salbaguardiá. Sinembargo, nos por kuminsá haña sosten finansiero kumpliendo naturalmente tambe ku e kondishonnan mará na e di dos i di tres transh. A konsekuensha di e krísis nos a logra haña un manera pa hasi e reforma i invershonnan ku mester. Si nos por siña algu di e krísis mundial aki, ta ku nos mester UNI den nos kompromiso pa nos por sali for di dje ku éksito.

Pueblo di Kòrsou, e ora a yega pa pone man na obra. Ban uni berdaderamente pa HUNTU, ku forsa di Todo Poderoso, nos logra un Kòrsou nobo i próspero.

Ban pa UN ETAPA NOBO!

Ministerio konserní 

This site uses Akismet to reduce spam. Learn how your comment data is processed.

error: Content is protected !!
%d bloggers like this: