Frakshon di PAR: Karta na presidente di Parlamento

 

Presidente di Parlamento di Kòrsou

Sra. Anna Maria Pauletta

Wilhelminaplein 4 

 

 

Djamars 13

 di òktober 2020

 


Tópiko: Komportashon di miembro di parlamento M dos Santos

 

 

Honorable Sra. Pauletta,

 

Pa medio di e karta aki frakshon di Partido Alternativa Real (PAR) den Parlamento di Kòrsou ta ekspresá su desaprobashon fuerte pa e insidente lamentabel ku a tuma lugá den Parlamento djabièrnè dia 9 di òktober 2020. Durante pleno reunion virtual riba e dia aki ku tabata keda transmití ‘live’ via medionan sosial i konvenshonal, miembro di Parlamento M. A. dos Santos verbalmente a agredí presidente di Parlamento di Kòrsou severamente i kontinuamente. Esaki tabata tin komo konsekuensia ku presidente di Parlamento no tabata tin otro opshon di retirá miembro di Parlamento dos Santos for di e reunion.

 

Frakshon di PAR ta remarká ku no ta promé biaha ku un semehante insidente ta surgi ku e mesun protagonista, esta miembro di Parlamento dos Santos. Na innumerabel okashon durante su disertashonnan, e miembro di Parlamento ariba menshoná ta ignorá palabrashonnan hasí pa ku e standardnan di komportashon i pa ku kumplimentu ku Reglamento di Orden durante reunionnan públiko.  Frakshon di PAR ta referí entre otro na un insidente ku a sosedé dia 28 di ougùstùs 2018 ku a resultá den un keho ofisial kontra komportashon di e miembro di Parlamento dos Santos i sostené pa un mayoria di Parlamento (11 firma) e tempu ei. 

 

E último atake di miembro di Parlamento dos Santos aki sin ningun provokashon kontra Presidente di Parlamento, no solamente un bes mas ta deslusí Parlamento di Kòrsou den su totalidat ante pueblo, pero tambe ta krea un ambiente di intimidashon i hostilidat pa tantu e personal di griffie ku tabata laborando na e momento ei komo demas parlamentarionan.  Frakshon di PAR ta remarká alabes ku e agreshon verbal for di e frakshon ku e miembro di Parlamento ta pertenesé na dje ta bira dia pa dia pió, loke ta perturbá funshonamentu di e órgano mas haltu den nos pais. No ta muchu tempu pasá ku presidente di Parlamento mester a retirá e otro miembro di e frakshon aki ku ta miembro di parlamento M. Rojer for di un reunion públiko i esaki tambe pa agreshon verbal i faltamentu ku Reglamentu di Orden. 

 

Frakshon di PAR den Parlamento ta hasi un apelashon urgente riba Presidente di Parlamento, pa, hasiendo uso di tur instrumento i medida disponibel, salbaguardiá òrdu i seguridat durante reunionnan di Parlamento, pa eliminá violensia verbal i kreashon di un ambiente hostil na boka di trabou di tur ku ta traha na parlamento di un forma efektivo.

 

Atentamente,

 

Stephen Walroud Gisette Seferina Jeser El Ayoubi

 

Curtley Obispo Shaheen Elhage

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: