Ganadónan Premio Charlwin ‘Broertje’ Marshall 2020

Ganadónan Premio Charlwin ‘Broertje’ Marshall 2020

Geplaatst op 14 October 2020 dor di Ministerio Enseñansa, Siensia, Kultura & Deporte

WILLEMSTAD – Gobièrnu di Korsou a hasi entrega di premio na ganadónan di ‘Premio Charlwin ‘Broertje’ Marshall 2020’. Esaki ta un kompetensia kulinario kaminda 11 hóben a partisipá. Nan mester a prepará un plato di entrada (aperitivo) i un plato prinsipal. Minister di Enseñansa, Siensia, Kultura i Deporte Sr. Eugene Rhuggenaath huntu ku representantenan di CHATA i CTB a presensiá e kompetensia aki, huntu ku eksperto gastronómiko Charlwin ‘Broertje’ Marshall.

Riba 27 di yüli 2020 tabatin e di dos kompetensha di ‘Premio Charlwin ‘Broertje’ Marshall’ na Marnix College. Gobièrnu di Korsou huntu ku Curaçao Tourist Board (CTB) i Curaçao Hospitality & Tourism Association (CHATA) a organisá esaki. Gobièrnu a instituí e ‘Premio Charlwin ‘Broertje’ Marshall’ na aña 2018 komo un premio den área di arte gastronómiko i kulinario. Charlwin ‘Broertje’ Marshall ta un “Master Chef” di renombre, tantu nashonal komo internashonal. Ta trata di un premio spesialmente pa hóbennan ku ta studia òf traha den e área kulinario.

E ‘Premio Charlwin “Broertje” Marshall’ ta un estímulo pa hóbennan por trese nan ideanan nobo i original den gastronomia lokal. Premio Charlwin “Broertje” Marshall ta konsistí di: 1) una kopa (den forma di e arte ‘e konfó den e bubble’), 2) un sertifikado, i 3) un suma di plaka. Nos artista lokal Sr. Giovanni Abath a traha e obra di arte ‘e konfó den e bubble’.

Konseho Kultural Kòrsou tabatin na su enkargo supervishon di e hurado pa e Premio Charlwin “Broertje” Marshall. E hurado a husga e platonan riba diferente aspekto manera entre otro uso di ingrediente karibense, presentashon, kalidat i sabor. Un kantidat di 11 partisipante a partisipá na e kompetensia kulinario, ku a konsistí di preparashon di un plato di entrada (aperitivo) i un plato prinsipal.

Kategoria Junior:
A otorgá Premio Charlwin “Broertje” Marshall den kategoria di Junior na Frederik Evelina. El a gana tambe pa mihó presentashon i mihó sabor. Juensley Calmera a sali na segundo lugá, i tabata esun mas kreativo den e kategoria aki.
Kategoria Senior:
Den kategoria Senior a otorgá e premio na Mauro Nataf, tambe el a gana mihó sabor. Ken Henry Suly a sali na segundo lugá, i mas kreativo i mihó presentashon den e kategoria aki.

Gobièrnu di Kòrsou ta felisitá tur e partisipantenan ku ta: Ken Henry Suly, Mauro Nataf, Juensley Calmera, Frederik Evelina, Nathan de Keyzer, Brayan Arroyo, Klarvin Cijntje, Thisainny Statie, Elbry Jansen, Sjoudmar Jamanica i Gylvianne Grigoria. Nan ta hòbennan ku pais Kòrsu por ta sumamente orguyoso di djé. Alabes ta yama e ganadónan, esta Frederik Evelina i Mauro Nataf pabien ku e logro grandi aki.

** Riba e potrètnan athunto por tuma nota di e kompetensia, platonan i kaminda Minister E.Rhuggenaath i representantenan di CHATA i CTB a hasi entrega di e Premio na ganadónan na Nildo Pinto SBO.

Klik aki pa mas potrèt: Album Entrega Premio Kulinario 2020

Ministerio konserní 

This site uses Akismet to reduce spam. Learn how your comment data is processed.

error: Content is protected !!
%d bloggers like this: