Relashoná ku e kaso lamentabel kaminda pa motibu di mal tempu diferente botonan na Boneiru a sufri daño djamars mardugá último, tin informashon ta sirkulá ku posiblemente Meteo lo mester tin parti den suministro di informashon pa por a saka alerta.

Relashoná ku e kaso lamentabel kaminda pa motibu di mal tempu diferente botonan
na Boneiru a sufri daño djamars mardugá último, tin informashon ta sirkulá ku
posiblemente Meteo lo mester tin parti den suministro di informashon pa por a saka
alerta.

Esaki no ta kuadra.
Primeramente Meteo kier a ekstendé su kombibensia na e doñonan di kua nan
botonan a senk òf a sufri daño pa e impakto di mal tempu aki (yama sùitwèst). Pa
Meteo mes tambe kada impakto di fenómenonan di Naturalesa ku surgi, sigur riba nos
islanan bisiña, ta mustra ku nos huntu ta forma parti pa mengua e vulnerabilidat pa
redusí impakto di wer severo.
Den kuadro di e tareanan di vigilansia di Meteo Kòrsou ta bon pa resumí kon e
responsabilidatnan ta repartí. Despues ku a desmantelá Antias na 2010, Meteo
Kòrsou a brinda servisio na Boneiru basa riba un akuerdo entre e Ministernan di
Kòrsou i Hulanda. Na 2016 e akuerdo a terminá i KNMI a tuna tur responsabilidat pa
Boneiru. Solamente den kaso di un menasa pa Orkan, tin kordinashon entre e paisnan
kual ta wòrdu kordiná dor di Sentro Nashonal di Orkan na Miami pa emití Alerta i
Atvertensia. Esaki ta sosodé den kuadro di e tratado di e Organisashon
Meteorológiko Mundial. Pues for di 2016 Meteo Kòrsou no tin e responsabilidat pa
suministrá informashon, tampoko emití alerta pa Boneiru.
Promé indikashon di e investigashon ku Meteo a hasi relashoná ku e evento aki ta
indiká ku alrededor di 22:00’or djaluna anochi a identifiká e área di mal tempu ku a
kuminsa desaroyá riba imágen di Radar di Meteo Kòrsou i ta move den direkshon di
Boneiru. Den e kuadro aki e Meteorólogo na turno a vigilá e mal tempu pa su posibel
impakto pa Kòrsou. Su evaluashon tabata ku e impakto di e “suiderwest” lo tabata
abou i no ta tin nesesidat pa emití un alerta pa Kòrsou.
Manera ta konosí e imágen di radar ta disponibel riba nos wèpsait i app (Curaçao
weather) kontinuamente i den kasonan di posibel alerta ta hasi uso di e “Live” riba
Facebook.
Meteo lo sigui hasi uso di teknologianan pa brinda pueblo di Kòrsou informashon
veridiko i konfiabel pa asina garantisá ku pueblo ta bon informá pa lokual ta trata
kondishon di mal tempu.
Vigilando wer 24/7 pa protehá bida i propiedat

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: