Athunto un karta ku pregunta na Minister Rhuggenaath di parti di Parlamentario Juniël Carolina di frakshon di MFK

Willemstad, 19 di òktober 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di OWCS, señor Eugenne Rhuggenaath.

 

Danki pa e koperashon.

 

Atentamente,

 

Juniel Carolina

Parlamentario pa

Frakshon di MFK

 

Na Minister di OWCS

Sr. E. Rhuggenaath 

Presente

 

Willemstad, 19 di òktober 2020

 

Tópiko: Parke di Beisbòl di Litte League den mal estado i sin mantenshon

 

Algun dia pasa, komo miembro di Parlamento di Kòrsou, mi persona a realisá un bishita na e Parke di Beisbòl di Little League na Suffisant. Mi a bai bek den mi mes historia i infansia, komo deportista i a kòrda kon vários aña pasa i tempu ku mi tabata mucha mi a yega di kompetí di forma sano den e fasilidat aki komo miembro di e ekipo di Mosaico Antillanos ku tabata e ekipo di mucha di beisbòl di e bario di St. Joris.

 

Nos tur  atraves di añanan ku a pasa, por a mira kon e kompleho aki tabata sede di vários kampionato di tantu di Little League, pero tambe di Senior League Internashonal. No papia mes di e kantidat di hungadónan di beisbòl ku a pasa den e ramonan aki hungando den e parke aki, ku awe ta suidadanonan ehemplar di nos pais.

 

Sr. Minister Rhuggenaath, ku hopi doló na mi kurason mi a tuma nota di e situashon di e parke Baseball aki i tambe den e bisindario kaminda e parke ta situá esta Muizenberg. Loke mi por a konstatá ta ku awe ta kedando únikamente rekuerdonan atras, ku ta di lamentá.

 

Un negligensha total di esnan ku ta responsabel pa e kompleho aki, pero tambe di e sektor di deporte di Kòrsou ku ta e instansia ku mester tin bista riba esaki i evitá ku awe nos tur ta lamentá, pa no bisa ta yora di e situashon ku e Parke aki ta aden.

 

Pa medio di e karta aki hasiendo uso di artíkulo 96 di reglamentu di órden i komo miembro di Parlamento mi ta hasi algun pregunta na Minister di OWCS.

 

  1. Señor. Minister Rhuggenaath ta na altura di e situashon di e Parke di Beisbòl na Suffisant mihó konosí komo Parke di Little League?

 

  1. Señor. Minister por informá Parlamento ken ta doño o instansia responsabel pa e kompleho aki?

 

  1. Señor minister por informá Parlamento , kiko gobièrnu por hasi  pa renobá e parke aki bek i pèrkurá ku esaki ta wòrdu usa pa kompetensia nashonal i internashonal?

 

  1. Señor. Minister Rhuggenaath por splika Parlamento kiko ta e maneho pa loke ta trata parkenan deportivo rònt Kòrsou?

 

 

  1. Señor minister por informá Parlamento kuantu kompleho di deporte en general tin na Kòrsou, por inventarisá nan un pa un, por indiká kua ta aktivo i kua no, ki plan gobièrnu tin pa ku esnan ku no ta aktivo?

 

  1. Señor minister por informá Parlamento si gobièrnu di Kòrsou tin un maneho general pa loke ta trata deporte na Kòrsou i ku Parlamento por risibí esaki ?

 

Komo miembro di Parlamento di Kòrsou pa frakshon di MFK i na nòmber di tur e deportistanan ku a praktiká e deporte di Baseball infantil, nos ta keda pendiente di e kontestanan riba e preguntanan i asina risibí klaridat i kiko ta bai pasa ku e parke.

 

Atentamente,

 

________________

Juniel Carolina

Parlamentario pa

Frakshon di MFK

P.s. Athunto algun foto pa ilustrá e situashon di e Parke di Beisbòl na Suffisant

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: