Petishon pa un reunion di komishon sentral konforme artíkulo 33 di Reglamentu di Orden (RvO) ku komo punto di agènda, “Desishon di gabinete Rhuggenaath pa sera Giro-Bank i retirá trahadónan, miéntras ku te awe no a informá Parlamento riba investigashon ku mester a tuma lugá pa sa e kousa di e desenlase fatal aki di Giro-Bank i ken ta e kulpabelnan”

 

Na: Presidente di Parlamento

Señora A. Pauletta

Wilhelminaplein # 4

PRESENTE

 

Tópiko: Petishon pa un reunion di komishon sentral konforme artíkulo 33 di Reglamentu di Orden (RvO) ku komo punto di agènda, “Desishon di gabinete Rhuggenaath pa sera Giro-Bank i retirá trahadónan, miéntras ku te awe no a informá Parlamento riba investigashon ku mester a tuma lugá pa sa e kousa di e desenlase fatal aki di Giro-Bank i ken ta e kulpabelnan”

 

Kòrsou, 25 di òktober 2020

 

Señor Presidente,

 

Frakshon di Movementu Futuro Kòrsou (MFK), pa medio di esaki kier pidi bo pa yama un reunion di komishon sentral mas pronto posibel ku e tópiko ariba menshoná. 

 

Frakshon di MFK a keda sorprendé di tende den prensa i riba retnan sosial ku ta bai sera Giro-Bank. Esaki ta un sorpresa hopi grandi pa nos frakshon, sigur despues di a tende Ministernan Rhuggenaath i Martina den un konferensia di prensa informá ku for di Hulanda lo bin sèn pa Giro-Bank.

 

Frakshon di MFK ta sumamente desepshoná ku gabinete Rhuggenaath te ku awe, ya kasi un aña ku a blòkia kuenta di klientenan di Giro-Bank no a hasi un investigashon pa sa kiko a sosodé ku a pone Giro-Bank den e situashon penoso aki. Ta parse ku gabinete Rhuggenaath no tin intenshon di pone ningun persona òf instansia responsabel pa e pèrdida di mas ku 700 mion florin aki.

 

Esnan ku lo ser perhudiká den hinter e desfalko aki ta siudadanonan ku a depositá nan konfiansa den e banko i empleadonan ku mester tende den porta di fin di aña ku nan ta bai pèrdè trabou. Esaki ta algu sumamente inhustu di parti di gabinete Rhuggenaath., ku un biaha mas ta skohe pa sakrifiká e trahadó i no e kulpabelnan.

 

Pa e reunion aki nos ta pidi Presidente di Parlamento pa invitá Minister Kenneth Gijsbertha di finansa i gerensia “Centrale Bank van Curaçao en St. Maarten” na e reunion aki, pa duna Parlamento e informashonnan nesesario.

 

Na nòmber di frakshon di MFK,

 

_

Gimar Pisas

Charles Cooper

Juniël Carolina