Lokual ku ta wordu traha na playa Kenepa a bira punto di diskushon.

November 2, 2020 REDAKSHON

Ultimo dianan hopi komentario a lanta pa loke ta wordu konstrui na playa Kenepa, e asina yama rampa of pasashi pa hende ku rolstul por yega na e laman. Nada kontra di personanan ku ta uza rolstul (pa esei ta duidelijk).

Parse ku tin un kantidat di hende ta kontra di e monstrosidat ku ta wordu konstrui na e playa Kenepa ku ta e playa ku ta ser konsidera e joya di Korsou.

Den pasado a traha un kasita pa kobra pa bai e playa di mas bunita i natural di Korsou. Pero den menos ku 24 ora a bati ku piedra i kousa destrukshon na e kasita pa demostra ku e playa mester keda liber pa tur hende por bishita.

Ban bek na loke ta wordu konstrui na playa Kenepa pa e personanan ku rol stul, un pregunta krusial ta keda ku ta ken ta bin ku e ideanan aki i ken ta hasi e investigashon ku ta bisa ku loke ta bai wordu traha ta faktibel i ken ta aproba e kos nan aki si buska konseho of si ta buska mes, ta ken ta e konseheronan ku ta duna nan aprobashon riba e tipo di konstrukshonnan aki.

Dia ku a bisa ku ta bai drecha e sitio pa stashona outo i bus di turista no a bisa ku lo bai traha e rampa of pasashi pa hende ku rol stul por pasa riba dje i yega na e playa.
Manera boso por mira loke a mustra i a manda pa publika ta e sitio di stashona outo i bus. Esei ta loke a manda den un komunikado pa prensa publika pa pueblo mira.

Riba nos pagina http://www.kikotapasando.com mes bo por mira e publikasho ku a bisa ku lo bai drecha e sitio di stashona aki titula:

Parkeo di Playa Kenepa lo pasa den un transformashon kompleto

I despues di esei a publika ora e tabata kla i ku stu titulo tabata: SITIO PA STASHONA OUTO I BUS NAN DI TURISTA A WORDU ADAPTA I RENOBA NA PLAYA KENEPA.

Ela wordu publika ku e potret abki bou

Nigun momentu no a bisa ku lo bai traha e rampa aki ni a mustra su pintura tampoko no a bisa unda lo bai pone esaki. Dikon no a hasi tur e publikashon nan nesesario manera debeser i manera ku a wordu hasi ku e sitio di parkeoof stashona outo i bus di turista. Dikon ta publika unu so i e otro no. Ta paso a premira ku lo bai tin resistensia pa ku e konstrukshona aki?

Riba e isal aki nos mester ta mas transparente pa loke ta trata kos di pueblo.

Riba e imagen aki bo ta mira un krus kora i un liña blou, e krus kora ta mustra unda e konstrukshon nobo ta wordu konstrui ku ta net na e trapi ora bo ta baha pa yega playa Kenepa i e liña blou ta ilustra un bahada ku tin kaba pa hende of personanan deshabilita por uza pa por yega na e playa. Dikon no a adapta e pida ku tin e liña blou ku tabata tei kaba na banda un tiki mas patras na banda di e seru. Dikon konstrui un struktura pontifikal ku lo domina i kambia tur e fachada di e playa?