Prome Minister Evelyn Wever-Croes:  GOBIERNO TA DEPOLITISA PROCESO DI OTORGAMENTO DI TERENO NA DIP 

 

Prome Minister Evelyn Wever-Croes: 

 

GOBIERNO TA DEPOLITISA PROCESO DI OTORGAMENTO DI TERENO NA DIP 

 

Prome Minister Evelyn Wever-Croes a informa Parlamento dialuna den e reunion publico pa trata Presupuesto supletorio cu prome decision cu el a tuma desde cu a asumi e responsabilidad di e cartera di infrastructura ta pa depolitisa e proceso di otorgamento di tereno. E departamento aki ta traha bou di hopi presion y Gobiero ta atende cu esaki debidamente. Actualmente tin dos investigacion andando (avestrus y flamingo) y tambe un investigacion forensico entama door di e ex Minister. Prome Minister ta enfatisa cu tur e investigacionnan aki lo continua, ningun investigacion lo wordo para. 

 

“Ademas, no ta descarta cu lo por bin mas investigacion, y un posibel caso pauwies, considerando locual cu ta mira cu a pasa. Den tur e investigacionnan aki tin un cos central: posibel influencia politico den otorgamento di tereno”, Prome Minister a expresa. 

 

Pa e motibo aki tambe, prome decision tuma pa Prome Minister tabata pa depolitisa e procesonan den e departamento DIP. Un Minister lo no por dicidi mas, sino e director hunto cu un otro persona, “vier-ogen principe”, pues dos hende cu ta firma e ‘aktenan’ y controla cu ta cumpli cu tur rekisito. Di e manera aki, e responsabilidad ta caminda cu e mester ta. Na momento cu ta trata desaroyo di proyectonan grandi, e departamento mester busca aprobacion di Gobierno pa percura cu esaki ta cuadra cu e vision di Gobierno. 

 

“Cu esaki ta sali for di e punto di bista cu lo tin menos espacio pa corupcion y esey ta nos meta. Den e siguiente dianan e ‘mandatering’ formal lo ta cla y e ora lo apodera esnan responsabel pa ehecuta e trabounan aki’, Prome Minister a enfatisa

 

Banda di esaki, Prome Minister a informa cu el a ricibi 503 akte sin firma, for di cual 200 ta di tereno pa cas y e resto ta huurgrond. Na momento cu e ‘mandatering’ ta cla, tur akte lo wordo firma irespecto preferencia politco di e personanan.

 

“Pasobra tur ciudadano cu ta biba na Aruba tin derecho riba tereno. Pues unabes e aktenan aki wordo firma, pueblo lo bay mira desaroyo pronto. Mester remarca cu desde maart un promedio di 150 huurgrond a wordo otorga y e meta ta pa 400 huurgrond wordo duna prome cu fin di aña pa esnan cu ta desea tereno chikito pa planta y haci agricultura, Prome Minister a termina bisando.