Awe dia 5 di novèmber 2020 ta Dia Mundial di Tsunami.

Awe dia 5 di novèmber 2020 ta Dia Mundial di Tsunami.
Durante de e asamblea general di Nashonnan Uni a asigná ofisialmente 5 di novèmber
komo Dia Mundial di Tsunami, pa paisnan konsientisá nan habitantenan di e peliger i
medidanan di redukshon di e riesgonan di un tsunami.
Relashoná ku e dia aki, Sekretario General di Nashonnan Uni, Sr. António Guterres, a
trese dilanti den su komunikado ku órganonan di Nashonnan Uni mester traha ku
partnernan rònt mundu pa eduká públiko, pa asina evitá pèrdida di bida ora ku e
siguiente tsunami tuma lugá.
Un tsunami ta un seri di ola di laman ku ta move ku velosidat di mas o ménos 800
km/ora riba laman hundu. Na momentu ku e tipo di olanan aki alkansá tera, e ta kousa
hopi destrukshon na propiedatnan i tambe kosta bida di hende. Un tsunami por wòrdu
generá pa motibu di temblor bou di fondo di laman, erupshon di volkan òf derumbe di
tera den laman.
Despues di e tsunami devastadó na desèmber 2004, kaminda alrededor di 230.000
hende a pèrdè nan bida na kostanan di Oséano Indio, komunidat mundial a realisá ku,
ounke e frekuensia di un tsunami ta abou, su impakto ta enormemente grandi. Pa e
motibu aki e Komishon Oseániko di UNESCO (IOC/UNESCO) a risibí e mandato pa
establesé un sistema di alerta pa tsunami rònt mundu.
Den e kuadro aki Servisio Meteorológiko a wòrdu apuntá pa representá Kòrsou den e
grupo gubernamental di koordinashon di tsunami pa Region di Karibe i Sentro
Amérika. Pues Meteo ta e instituto responsabel pa emití mensahe di alerta pa
tsunami, na nòmber di Gobièrnu. Komo parti di programa di IOC/UNESCO, Servisio
Meteorológiko ta disponé di teknologia pa registrá i monitoreá temblor den e área di
Laman Karibe, tambe posibel menasa pa tsunami i ta kompartí esaki ku tur pais
miembro. Na 2010 Meteo a koordiná un grupo di trabou pa identifiká e riesgonan di
tsunami pa Kòrsou. Tambe durante di e último añanan Meteo a desaroyá un sistema
pa por emití alerta òf atvertensia den ménos ku tres minüt, for di momentu ku konstatá
ku e fenómeno natural aki por bira un menasa pa nos isla. E sistema aki ta kontribuí
na alertá pueblo di Kòrsou muchu mas lihé i por yuda skapa bida. Na 2012 i 2018
Kòrsou tabata anfitrion di e reunion di grupo gubernamental di koordinashon.
Di e manera aki Meteo lo sigui hasi su esfuersonan konforme tratadonan, pa vigilá
wer ekstremo i otro peligernan di naturalesa, pa asina por protehá bida i propiedat di
pueblo di Kòrsou.
E potrètnan athunto ta mustra delegadonan na apertura di e reunion di grupo
gubernamental di koordinashon di tsunami ku a tuma lugá na aprel 2018 na Santa
Barbara Beach and Golf Resort.
E mapa di Kòrsou ta mustra e áreanan kaminda poblashon ta kuri mas riesgo di
inundashon (kòrá) den kaso di un tsunami.
(Foyeto: https://www.meteo.cw/Data_www/pdf/pub/TSUN_pap-compressed.pdf).
Rapòrtnan: https://www.meteo.cw/Data_www/pdf/pub/TSU%20_final.pdf;

Click to access RA%20_final.pdf

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: