#BONOTABOSO: Plan Nashonal kontra Abusu ta konsientisá tokante kamindanan pa kana

#BONOTABOSO: Plan Nashonal kontra Abusu ta konsientisá tokante kamindanan pa kana

Geplaatst op 05 November 2020 dor di Ministerio Desaroyo Sosial, Labor i Bienestar

Willemstad – Plan Nashonal kontra Abusu di mucha, violensia doméstiko i relashonal den luna di novèmber ta konsientisá pueblo di Kòrsou riba e instansianan i kamindanan di kana pa e siudadano ku ta pasa den abusu. Ministerio di Desaroyo Sosial, Labor i Bienestar ku ta responsabel pa e Plan aki huntu ku e Ministerionan di Hustisia, Salú, Medio Ambiente i Naturalesa, Enseñansa, Sensia, Kultura i Deporte ta lansa e proyekto aki, ku ta unu di konsientisashon.

Tin diferente instansia gubernamental i no gubernamental ta traha riba e fenómeno di abusu aki. Sinembargo ainda nos no a eliminá abusu. Den nos afan pa atendé ku kasonan di abusu nos a uni forsa ku e.o. Amnesty International, PSI-Skucha-Mi, Bos di Hubentut, Stichting Slachtofferhulp Curaçao, Voogdijraad/CMK, Aliansa, Veiligheidshuis/AJJC, Telefòn pa Mucha i Hóben, CAFRA, SEDA, Famia Plania, Openbare Ministerie pa asina konsientisá, informá i eduká habitantenan di Kòrsou tokante instansianan i kamindanan pa kana pa buska yudansa sea pa su mes, su famia o konosí.

P’esei lo usa “#BONOTABOSO” durante e kampaña aki. Ku e kampaña aki no solamente ta informá i konsientisá komunidat di tur e organisashonnan ku ta atendé ku kasonan di abuzu, pero tambe lo duna informashon tokante señalnan i konsekuensianan di abuzu. Durante novèmber lo usa facebook di Plan Nashonal den diferente forma ku e meta pa interaktá ku personanan ku ta hasi uso di facebook. Lo publiká pòstnan kuminsando 5 di novèmber. Lo start ku seshonnan live e di dos djaweps di e luna pa 15:00 or. Den e seshonnan aki e moderadó Flavina Wanga lo ta den entrevista ku instansianan i ministernan pa papia riba desaroyo di kombatimentu di abuzu na Kòrsou. E seshonnan aki ta keda riba e página pa un persona por wak e semper i lo pidi tur e organisashonnan ku ta den plataforma pa yuda ‘share’, kompartí, esaki na momentu ku e ta ‘live’. Tur djaluna 10:00 di mainta lo tin un pòst kaminda ta hasi uso di #BONOTABOSO i trata diferente temanan. Riba djamars ta informá e siguidónan di e página di facebook riba e tópiko di djaweps.
Plan Nashonal kontra Abusu ta pidi tur siguidónan di facebook pa nan kuminsá inbòks posibel pregunta ku nan por tin i tambe kòrda nan ku por hasi pregunta durante e programa‘live’. Djárason ta dia di sifra i echo. E sekshon aki ta titulá ‘bo tabata sa? Esaki ta pa konsientisá i eduká riba e tópiko aki, brindando sifranan ku ta disponé di dje.

Djabièrnè lo hasi un kwes kaminda lo publiká un pòst ku un pregunta, personanan por yena esaki i ‘share’ é. Meta di esaki ta pa e página di Plan Nashonal riba facebook ta interaktivo ku su siguidónan. Lo post e kontesta riba e pregunta e siguiente djaluna 3:00 or, inkluso mas informashon riba e pregunta. Durante henter e luna di novèmber e diferente instansianan lo ta di bishita na nos radio- i kanalnan di televishon kaminda ampliamente nan por duna informashon balioso di nan trabounan i kua tipo di sosten nan ta brinda e pueblo Kòrsou. E GO i NGOnan lo sigui traha riba e diferente puntonan di akshon pa yuda prevení abuzu i alabes brinda e yudansa i sosten nesesario na kada persona ku ta hañé den un kaso asina aki.

This site uses Akismet to reduce spam. Learn how your comment data is processed.

error: Content is protected !!
%d bloggers like this: