KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNUNOTISIA

Parlamentario Seferina (PAR): KIKO TA PASANDO NA PLAYA ABOU (KENEPA GRANDI)???

 

Parlamentario Seferina (PAR):

KIKO TA PASANDO NA PLAYA ABOU (KENEPA GRANDI)???

 

WILLEMSTAD- E desaroyonan na Playa Abou, mihó konosí komo playa Kenepa Grandi, ta sklama pa un splikashon urgente di e minister enkargá ku maneho sostenibel i responsabel di e rekurso natural di mas importante di nos pueblo di Kòrsou: su playanan públiko! Den e kuadro aki parlamentario Gisette Seferina (PAR), despues di un bishita na e sitio, ta lansa un kantidat di pregunta na Minister señora Zita Jesus- Leito, ku ta esun enkargá ku tantu e ministerio di salú, medioambiente i naturalesa, komo esun di tráfiko transporte i planifikashon úrbano. E intenshon ta pa pueblo por haña un bista ophetivo i balansá di e proyekto en kuestion.

 

Segun Seferina, intenshon tabata pa, den kolaborashon ku Curaçao Tourism Board (CTB), Gobièrnu di Kòrsou konstruí un lugá di stashoná ku por akomodá e kantidat grandi bishitante lokal i turista, ku ta frekuentá e playa ariba menshoná, i alabes drecha fasilidatnan na e playa mes, pa e bishitante por ta mihó sirbí. Pero loke e parlamentario a tuma nota di dje personalmente na e playa, ku aparte di a konstruí luganan di parker, tambe un konstrukshon enorme i monstruoso: un supuesto rampa di akseso pa personanan ku mester hasi uso di ròlstul pa yega laman, ku no ta kuadra ni den su diseño ni den su konstrukshon ku desaroyo responsabel i sostenibel na un playa públiko! 

 

“Ta komo sifuera esnan ku a traha e kos ei no a tuma ningun klase di konseho serka ningun hende na tinu promé ku nan a planta e desaster ei te den laman na e playa! E konstrukshon ta deslusí e playa, i e ta kita mas o ménos 15 meter di akseso direkto na laman,” asina e parlamentario a deklará. 

 

Seferina ta rekonosé e mesun tipo di falta di konsenshi i kompetensia profeshonal den e disaster di konstrukshon na Playa Kenepa Grandi ku el a bini ta señalá pa años kaba na otro proyektonan na playanan manera Playa Piskadó,  Playa Caracasbaai, i Playa Lagún, kaminda no ta tene kuenta ku naturalesa i medioambiente, ku ta netamente e motibu prinsipal ku bishitantenan ta bai laman. Tambe Seferina a tuma nota ku Minister di Desaroyo Ekonómiko, Minister Martina, via di un video a anunsiá ku lo bini un trapi denter di 7 siman na e sitio.

P’esei e parlamentario ta lansa e siguiente preguntanan na Minister Señora Zita Jesus- Leito, ku ta enkargá ku tur loke ta sosodiendo ku desaroyo i mantenshon di nos playanan públiko. 

 

  • Minister a tuma nota di e desaroyonan na Playa Abou, mihó konosí komo Playa Kenepa Grandi?
  • Minister a tuma nota di e anunsio di Minister Martina di un trapi riba e playa?
  • Minister a outorisá e konstrukshon di tur e strukturanan en kuestion?
  • Kua di e departamentonan di maneho i/o  ehekushon di e ministerionan ku Minister Jesus- Leito ta responsabel p’e, tabata envolví den dunamentu di konseho? 
  • Tabatin konsehonan di ekspertonan i/o entidatnan eksterno tambe?
  • Minister por splika pueblo e proseso di tuma desishon ku a resultá den outorisashon pa traha e rampa di akseso pa ròlstul na e playa di Kenepa Grandi?
  • Tabatin un destaho públiko pa e proyekto aki?
  • Kua kompania di konstrukshon i/ o kontratista a gana e destaho?
  • Kuantu e desaroyo na Playa Kenepa Grandi lo kosta pueblo di Kòrsou?
  • A reservá fondo pa mantenshon di e playa i strukturanan ku a konstruí na Playa Kenepa Grandi?

______________________________________________________________

Gisette Seferina

Miembro di Frakshon

639114718427035"
639114718427035"