Global Entrepreneurship Week ku programa virtual, interesante i variá

Global Entrepreneurship Week ku programa virtual, interesante i variá

 

WILLEMSTAD – E aña aki, pa di shete okashon konsekutivo, e direktiva organisadó di Global Entrepreneurship Week (GEW) Curaçao, huntu ku su partnernan, a prepará un programa interesante. E siman durante lo selebrá emprendimentu na 2020 ta di 16 pa 22 di Novèmber. “E pandemia a pone ku nos tambe mester a sinta pensa kon nos lo por a kontinuá ku Global Entrepreneurship Week di un forma inovativo i adaptá na e situashon aktual,” sra. Elgenia Pieternella, presidente di GEW pa Dutch Caribbean, a bisa. “Pa Kòrsou nos a skohe komo slogan; ‘Business The Unusual Way’. E tabata un reto grandi, pero mi por bisa ku orguyo ku despues di masha hopi ora di brainstorming i preparashon, nos por presentá un programa diferente, variá i di kontenido interesante. Diferente pasobra e aña aki tur nos aktividatnan lo ta virtual, variá pa un skala amplio di tema ku lo tira lus riba dje i di kontenido interesante pasobra kada presentadó ta profeshonalnan ku a proba nan mes, tantu riba merkado lokal, komo internashonal den e áreanan di ekspertisio ku nan lo trata. Mi ta papia di ‘nos’ pasobra e aña aki nos ta bai hasi programanan en konhunto ku GEW Bonaire, ku kua pa algun aña kaba nos tin un kolaborashon estrecho i tambe ku Sint Maarten, a base di un MoU ku nos a firma e aña aki ku The PWR Agency pa organisá GEW.” 

 

Mas aleu e presidente di GEW pa Dutch Caribbean a bisa ku mester elogiá e esfuerso i kontribushon di kada organisashon i individuo partner. “Despues ku aña pasá GEW Curaçao a gana e premio: ‘Catalyzer For Most Partners Per Capita’, entre 170 pais na e kongreso mundial organisá na Bahrain pa Global Entrepreneurship Network, nos mira ku e famia di partner a sigui krese. Esei ta yena nos ku satisfakshon. Alabes mi por informá ku GEW Curaçao 2020 tin asina tantu aktividat ku nos a opta pa hasi algun evento pre – i post e siman di 16 pa 22 di Novèmber,” sra. Pieternella a informá. “Mi ta kere ku pronto nos lo por anunsiá un Entrepreneurship Month komo ku e konsientisashon ku mester sigui stimulá ‘entrepreneurship’ a sigui oumentá ku añanan ku nos ta tene GEW.”

 

Nos ta invitá tur hende pa bishitá e website www.gewcuracao.com, ku ta e plataforma prinsipal kaminda por haña informashon i alabes por registrá pa e diferente aktividatnan. Banda di e website nos lo kompartí informashon tambe riba e página di Instagram i di Facebook di Global Entrepreneurship Week Curaçao i lo hasi live streaming di e aktividatnan.”

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: