ENTREGA DI PIN DI SALON DI FAMA NA ANTHONY MINGUEL 

ENTREGA DI PIN DI SALON DI FAMA NA ANTHONY MINGUEL  

 

Djabièrnè 6 di novèmber 2020

 

Federashon Deporte i Olímpiko Korsou (FDOK) djabièrnè 6 di novèmber durante kampeonato nashonal di atletismo, a hasi entrega di pin di Salon di Fama na Sr. Anthony (Tonchi) Minguel. 

 

Sr. Minguel a keda instalá den Salon di Fama riba 31 di mei 2014. Pa motibu ku e tabata biba den eksterior e no por a risibí su pin huntu ku e demas miembronan instalá. FDOK a wòrdu pone na altura ku sr. Minguel ta di bishita na Korsou i mesora a bini ku e idea pa ku e entrega. Den kolaborashon ku Curacaose Atletiek Unie (CAB) a disidí di hasi e seremonia di entrega na nan kampeonato nashonal di atletismo kual ta hustamente e deporte den kua sr. Minguel a profilá. FDOK tabatin e plaser di entrega e pin na sr. Minguel den kompania di su famia i amistatnan na e evento menshoná. Sr. Minguel ta otro deportista ku a destaká riba tereno deportivo i ku ta miembro di salon di fama di Korsou.

 

Direktiva di FDOK kier a hasi uso di e oportunidat aki pa un biaha mas felisitá sr. Minguel i famia pa risibimentu di su pin di salon di fama. Un danki na famia i tur ku di un manera of otro a hasi realisashon di e seremonia aki posibel. 

———————————————————

 

CV BALUARTE

 

Sr. Anthony Philomeno (Tonchi) Minguel (Atletismo)

Deportista – Dirigente Atministrativo – Dirigente Tékniko

Tonchi a kuminsá ku deporte na St. Thomas College hungando Futbol,  mas despues beisbol. Ku su 13 aña Tonchi a sera konosí ku atletismo, i ku su 17 aña el a kuminsá práktika atletismo den stadion di Rif. Su disiplinanan tabata pushamentu di bala di heru, tira sper i disko.

Na aña 1970 el a kompetí komo atleta na Weganan Deportivo Sentroamerikano i di Karibe (SAK) na Panama tirando sper i na aña 1972 den kampeonato SAK na Jamaica.

Komo entrenadó Tonchi na 1974 a sigui kurso di atletismo na Springfield College, tambe na 1975 na CDOM na Mexico City.

Kurso di entrenadó i di atministrashon deportivo na 1975 / 1976 na Utrecht, Hulanda.

Kurso di entrenadó i di atministrashon deportivo na 1982 na Roma, Italia.

Na 1986 i 1988 kurso di atministrashon deportivo na San Juan, Puerto Rico. Na Roma, Italia na 1987 kurso di alto nivel atministrativo deportivo. 

Na 1997 seminario na Nassau, Bahamas rumbo pa 2000.

Tonchi a funda e promé klup di atletismo era nobo “Olympic”, na 1962 el a reaktiva Nederlands Antilliaanse Atletiek Unie (NAAU). 

Na 1966 el a yuda reaktiva Curacaose Atletiek Bond (CAB).

Tonchi tabata forma parti di komishon Tékniko di atletismo, tambe el a okupá diferente funshon entre otro miembro di direktiva NAAU, miembro di direktiva di CAB, presidente di CAB, presidente di Confederacion Centro Americano y del Caribe, vise presidente di North America, Central America and Carribean (NACAC), miembro di direktiva di Nederlands Antilliaanse Olympische Comité (NAOC).

 

Tonchi a representá Antia Hulandes na hopi evento i tambe na numeroso kongreso na:

• 1982 na Gresia,
• 1984 na Los Angeles,
• 1985 na Stuttgart,
• 1987 na Roma,
• 1989 na Barcelona,
• 1991 na Tokyo,
• 1993 na Stuttgart,
• 1995 na Goteberg,
• 1997 na Gresia,
• 1999 na Sevilla,

Tonchi tabata nombra tambe komo International Technical Official na diferente pais entre otro Puerto Rico, Colombia, Spaña, México, Bahamas, Argentina, Merka i Fransia.Tambe Tonchi a duna kurso pa hurado di atletismo.