Muriell Mamber: “Mi eksperiensia komo kolaboradó di parlamentario sr. Rennox Calmes”

Willemstad – 10-11-2020

Mi nòmber ta Muriëll Mamber i por medio di esaki mi ta deseá pa kompartí mi eksperiensia komo kolaboradó di parlamentario sr. Rennox Calmes.

Mi ta sumamente agradesido ku e oportunidat ku a ser presentá aki i mi a kue tene ku dos man. E motibu ta ku awor mi por ta un tiki mas serka na aportá na desaroyo di nos pais. Tin diferente manera di aportá na bo pais i polítika sigur ta un di e vehíkulonan pa por realisá esaki. 

Mi ta agradesido ku un hóben adulto den e kaso aki sr. Calmes, a duna un otro hóben adulto e oportunidat pa e tambe por krese den su trabou komo profeshonal riba e tereno sosial ekonómiko i tambe komo persona. E trabounan ku mi ta ehersé aktualmente komo kolaboradó ta entre otro hasi investigashonnan riba temanan aktual, lesa i skibi rapòrt ku konseho, akudí na diferente reunion huntu ku e parlamentario èts. Komo ku mi tin kasi 10 aña largu di eksperensha di trabou den sektor públiko mi a sintimi mas yamá ahinda pa e trabou.

Mi deseo ta no solamente pa desempleo bou di hóbennan i hóbennan adulto baha, pero pa e gruponan aki haña tur ‘tools’ nesesario pa nan por desaroyá i elevá nan mes. E parti di ‘entrepreneurship’ sigur ta un método. Mi ta kontentu di mira mas desaroyo e último añanan riba e tereno aki na Kòrsou. Ideal ta pa tur gremio ku tin afinidat pa ku ‘entrepreneurship’ por haña e preparashon nesesario pa asina hiba nan mes i nan famia dilanti, sin depende solamente riba un dunadó di trabou. 

Na 2016 mi a partisipá dos biaha na elekshon i mi a logra di obtené 105 i despues 113 voto. Mi a kampañá entre otro pa mamanan soltero empresario. Na mes un aña mi a yama ayó na e partido ku mi tabata forma parti di dje (Movementu Progresivo) komo ku mi no por a haña mi mes bek den e partido mas, netamente riba e tereno di desaroyo pa ku hóbennan (adulto), ku ta e futuro di Kòrsou. 

Esaki no a strobami nunka pa a sigui yuda hende ‘trai kortina’ ku konseho. Pa motibunan personal mi a skohe di no subi lista e biaha aki. Pero awe mi por bisa ku mi ta kontentu di por yuda sostené un parlamentario hóben adulto ku tabatin e kurashi pa skohe di no ta un robòt. Un proyekto ku e tin riba planning ku sigur mi ta kere aden, ta e proyekto di Maal na Oostpunt. Úniko kos ku Kòrsou mester hasi ta buska invershonista tantu lokal komo internashonal ku lo ke yuda invertí den e área aki ku tin hopi potenshal turístiko i tambe industrial pa Kòrsou. Esaki lo soru pa desaroyo i kupo di trabou.

Ban hiba Kòrsou dilanti na 2021.