‘Diáspora for Business Summit’, un revolushon den ideanan inovativo i duradero pa nos ekonomia.

‘Diáspora for Business Summit’, un revolushon den ideanan inovativo i duradero pa nos ekonomia.

Geplaatst op 11 November 2020 dor di Ministerio Desaroyo Ekonómiko

 

WILLEMSTAD- E aña aki Ministerio di Desaroyo Ekonómiko (MEO) ta organisá e promé edishon di ‘Diaspora for Business Summit’. Esaki lo ta un konferensia virtual enfoká primordialmente pa rekonektá e yu di Kòrsou bibá na otro partinan di mundu ku nos Dushi Kòrsou i stimulá mihó interkambio di konosementu i ideanan inovativo. ‘Diaspora for Business Summit 2020’ ta keda lansá awe pa Minister di Desaroyo Ekonómiko, dr. Steven Martina durante un rueda di prensa. Diaspora for Business Summit lo tuma lugá 30 di novèmber te ku 2 di desèmber.

Kiko e palabrá diáspora ta nifiká? Diáspora di Kòrsou ta e yu di Kòrsou bibá afó i hendenan ku ta identifiká nan mes di un forma òf otro ku Kòrsou pero tambe diáspora di Kòrsou ta hendenan ku orientashon internashonal ku ta biba i traha tur kaminda na mundu.

Kòrsou ta un pais riku na yunan di tera ku mundialmente ta okupá posishonnan prominente riba diferente tereno di ekspertisio i/òf ta forma parti di tim di maneho di kompanianan internashonal. Hasiendo uso di e konosementu i ekspertisio di Kòrsou su diáspora nos por entre otro logra  posishoná Kòrsou internashonalmente, prevení ku diáspora tin informashon robes, identifiká i fasilitá invershon, interkambio di konosementu, krea un ret global di diáspora di Kòrsou i un banko di data (database) di ideanan inovativo i mantené un fluho di informashon ophetivo pa diáspora por keda bon informá riba desaroyo di Kòrsou riba un base kontinuo.

E ‘Diaspora for Business Summit 2020’ su enfoke prinsipal lo ta riba Kòrsou su Strategia Nashonal di Eksportashon. Den e Strategia aki, Kòrsou a identifiká diferente sektor di prioridat riba kua nos por uza ekspertisio i konosementu di Kòrsou su diáspora pa por sigui inová i desaroyá. Algun di e sektornan aki ta entre otro e sektor di informashon i teknologia, turismo, industria kreativo, haf i marina, servionan di edukashon dirigí riba eksportashon  i servisionan finansiero internashonal. Ademas lo enfoká riba sektornan ku mundialmente tin avansenan eminente manera por ehèmpel salubridat i bioteknologia, energia renobabel i duradero i sigur pa Kòrsou un área kaminda nos a destaká mundialmente ku ta esun di deporte. Ademas durante e Diáspora for Business Summitt lo tin un kompetensha riba e idea mas revolushonario i inovativo pa Kòrsou. E ganadó lo risibí un premio na balor di 5000 florin den forma di sosten empresarial (p.e. wèpsait, merkadeo etc.). Tambe e idea ganadó lo risibí sosten i konseho (coaching) riba vários tereno.

Durante di un konferensia di prensa djaweps, 05 di novèmber último, Minister di Desaroyo Ekonómiko, dr. Steven Martina a splika ampliamente dikon ta imperativo pa awor mas ku nunka nos ubiká i konektá ku Kòrsou su diáspora i krea un laso pa asina logra konstruí un ekonomia  muchu mas duradero i dinámiko; primordialmente den nos enfoke pa alkansá rekuperashon ekonómiko despues di e era di Covid-19. Minister Martina ta suprayá ku e ‘Diaspora for Business Summit’ aki, ta marka un paso inmenso den kreashon di un revolushon di ideanan ekonómiko, inovativo  i duradero pa Kòrsou.

Tur persona interesá por partisipá na e konferensia Diaspora for Business. Pa mas informashon tokante e konferensia i pa registrashon, bishitá whatscookingincuracao.com/diaspora-summit/.

Pa e presentashon ku a keda kompartí durante e rueda di prensa ariba menshoná, klek aki: https://bit.ly/38EWcz0

 

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: