Konferensha tokante Fondonan Oropeo tabata un gran éksito
Konferensha tokante Fondonan Oropeo tabata un gran éksito
Geplaatst op 12 November 2020 dor di Ministerio Desaroyo Ekonómiko
WILLEMSTAD – Den e siman di 19 te ku 23 di òktober último, EU Desk Curaçao huntu ku Minister Plenipotensiario suplente di Kòrsou, sra. Eunice Eisden, a tene un eksitoso siman di informashon tokante fondonan Oropeo. E siman di informashon akí a konta ku partisipashon di aproksimadamente 210 partisipante ku a toka parti na vários di e seshonnan. Un total di 5 organisashon Oropeo a tene presentashon tokante temanan manera posibilidat i formanan di traha di e diferente organisashonnan i programanan di supsidio. E partisipantenan tabata sumamente satisfecho ku e inisiativa akí i a mustra hopi interes pa e siguiente aktividat di entrenamentu ku EU Desk Curaçao ta bai tene próksimamente.
EU Desk Curaçao ta resortá bou di Ministerio di Desaroyo Ekonómiko (MEO) komo un departamentu di e Sektor di Koperashon Internashonal. Meta di EU Desk Curaçao ta pa fasilitá akseso na informashon tokante koperashon i oportunidatnan di supsidio for di Union Oropeo.
E siman di informashon den luna di òktober último a keda organisá ku e enfoke pa kumpli ku e nesesidat serka vários di nos hendenan pa risibí mas informashon tokante e programa i areglonan di supsidio Oropeo. Tin organisashonnan lokal ku a indiká ku hopi bia nan no sa kiko ta e prosedura pa por haña akseso i kon pa traha ku e fondonan akí. Ku e siman di informashon akí, EU Desk Curaçao den korto tempu ta spera di por subi e partisipashon di tantu organisashonnan lokal komo siudadanonan den e diferente fondonan Oropeo ku tin na nos disposishon.
E diferente seshonnan di informashon na luna di òktober último a keda presentá pa EU Desk Curaçao huntu ku Ministerio di Enseñansa, Siensia, Kultura i Deporte, diferente Agensia Hulandes ku ta bai tokante e fondonan aki, Asosiashon di paisnan ultramar (OCTA) i Direktorado General di Koperashon Internashonal i Desaroyo di Union Oropeo (DEVCO). E último organisashon aki a papia entre otro tokante e asina yamá Green Deal Oropeo. OCTA a duna informashon tokante e siklo nobo di programanan di Union Oropeo pa e periodo 2021 te ku 2027.
Di parti di Hulanda, EU Fondsen Week 2020 a konta ku koperashon di:
- Creative Europe (Dutch Culture), esaki ta e agensia sentral na Hulanda pa tur kos ku tin di haber ku e programa Creative Europe. E programa aki ta konsistí di dos parti, un pa sektor kultural i un pa prensa i sektor oudiovisual;
- Agensia Nashonal pa e programa Erasmus+. Esaki ta e punto sentral na Hulanda pa e programa aki. E ta dirigí riba tur sektor di enseñansa i edukashon, for di edukashon primario te ku edukashon pa adulto;
- Agensia Nashonal Erasmus+ ku ta dirigí prinsipalmente riba Hubentut i e Kuerpo Oropeo Solidario (European Solidarity Corps). E programanan aki su meta ta pa duna hóbennan oportunidat pa desaroyá nan talentonan i asina duna direkshon na nan bida i stimulá trabou boluntario.
Na 2019 tambe EU Desk Curaçao a ehekutá un programa di informashon similar pa partisipantenan lokal. Keda pendiente den e simannan benidero na momentu ku EU Desk ta bai tene diferente seshon di práktika kon pa skibi un petishon ku ta kuadra ku e eksigensianan di Union Oropeo pa por risibí finansiamentu.
Pa mas informashon tokante aktividatnan di EU Desk Curaçao i pa un link pa (bolbe) wak e presentashonnan di EU Fondsen Week 2020, por bishitá e página di Facebook di EU Desk Curaçao.
