Prome bishita di scol di aña escolar 2020/2021 na Museo Arqueologico

Prome bishita di scol di aña escolar 2020/2021 na Museo Arqueologico

E klasnan 1a,b y c di Colegio Sagrado Curason a bishita Museo Arqueologico Nacional Aruba (MANA). Esaki tabata e prome bishita di scol cu MANA a ricibi den e aña escolar nobo, despues cu covid-19 a manifesta na Aruba. Actualmente scolnan por bishita e salanan di exposicion di MANA riba cita. MANA ta ofrece guia y actividad na e nivel di e alumnonan. 

Muchanan di Sagrado Curason a goza di nan bishita na Museo. Nan a haya un guia tematico den e sala di exposicion permanente, como tambe di e exposicion temporario Caribbean Ties. E alumnonan a experiencia con e hendenan di Caribe, antes y awor ta conecta cu un pasado comun. Un ehempel den nan tradicionnan manera con nan ta y tabata cushina y nan tene celebracionnan. Tambe nan a siña con Indjannan di Aruba tabata biba, con nan tabata decora nan curpa pa celebracionnan y ki herment nan tabata usa. Despues di a siña con Indjannan tabata traha hacha, nan mes tambe a bai traha nan propio “hacha”.

Si bo ta desea di planea un bishita cu bo scol na MANA, por manda un peticion via email pa dir.mana.aw@gmail.com. Por fabor menciona cuanto klas, cua klas, cuanto alumno y cuanto docente y mayor lo acompaña e alumnonan durante nan bishita. Tene na cuenta cu mester manda e peticion por lo menos 3 siman adelanta pa e por ser tuma den consideracion. Tur peticion lo ser evalua a base di e reglamento di Covid-19 cu ta na vigor na e momento ey.

Museo Arqueologico Nacional Aruba ta habri pa publico di dialuna pa diabierna di 9.30 di mainta pa 4.30 di merdia. MANA ta ubica na Schelpstraat 42, den e compleho di edificionan historico y moderno patras di Supermercado Kong Hing den Havenstraat. Por tuma contacto cu Museo na tel. 582-8979 pa mas informacion. Sigui nos riba e paginanan di Facebook Archeo Aruba y National Archaeological Museum Aruba.

This site uses Akismet to reduce spam. Learn how your comment data is processed.

error: Content is protected !!
%d bloggers like this: