DIA DI MUSIKO 2020

 

DIA DI MUSIKO 2020

WILLEMSTAD — Djadumingu dia 22 di novèmber awor ta dia di Músiko i e aña aki den kuadro di e medídanan di e epidemia Covid-19, lo no por  keda selebrá manera ta e kustumber último añanan.

Sinembargo, si e situashon di Covid-19 ta permití, den luna di desèmber direktiva di AMAK lo  evaluá si por tene un aktividat di karakter Sosial Edukativo pa miembronan.

Konsiderando e situashon di krísis ku Kòrsou i mundu hinter ta pasando aden aktualmente, Direktiva di AMAK a tuma e desishon pa no realisá ningun aktividat ku tin un karakter festivo.

Direktiva di AMAK di e forma aki, ke manda señalnan bon kla ku aña 2020 tabata un aña hopi difísil pa e sektor di Farándula i tumando na kuenta tambe e reglanan di Covid-19 ku mester evitá aglomerashon, ta motibunan sufisiente pa kanselá selebrashon di Dia di Músiko 2020 den su forma tradishonal.

 

Esensia di selebrashon di Dia di Músiko den su forma original ta, ku esaki mester ta un dia di reflekshon, den kual ta duna atenshon na e balor di ser Músiko i e balor ekonómiko di e funkshon aki den nos pais.

E selebrashon aki a inisiá for di 1970 i na 1989, direktiva di AMAK den konsulta ku Sra. Nilda Supriano, a instituí e Premio Edgar Supriano. 

E premio aki ta un premio pa stimulá e Músiko i/o artista pa por sigui avansá i progresá den su bida artístiko.

E NO ta un kompetensia. E premio mester keda  otorgá  primeramente na músikonan o pèrsonanan ku ta ehersé un labor ku ta  ligá na un instrumento musikal manera un tokadó di kai òrgel. ( Koronanan tambe por ta nominado).

 

No ta e idea pa e premio aki keda konvertí den un kompetensia den kual ta definí ganador i pèrdèdó. Pues e premio mester keda mantené den un ambiente positivo.

Aparte di grabashon e efekto durante presentashonnan popular tambe ta entre e  faktornan importante den balorisashon di e músiko o artista. 

E premio ta un trompeta di oro di balor, sea pa pega na paña o riba un pedestal (Grupo).

Premio Edgar Supriano, mester ta un premio pa yega na mas union, i hamas mester krea espasio pa diskushon i enemistad entre esnan ku no keda premiá.

 

Aparte di e premio Edgar Supriano, direktiva di AMAK tambe ta evaluá semper si den e aña koriente tin personahenan ku por ser konsiderá komo baluarte i ku a duna un kontribushon balioso na e sektor di farándula durante hopi aña. E personahenan aki ta risibí un Pen di Mérito ku ta den forma di un harpa. pa pega na paña. 

Esaki ta un kompetensia di direktiva di AMAK i/o proposishonnan di miembronan.

 

Internashonalmente ta selebrá Dia di Músiko riba diferente fecha, pero den hopi pais Latina Amerikano, a skohe dia 22 di novèmber, fecha ku ta rekordá Santa Cicilia ku tabata un Músiko kantante, ku pashon ma músika i ku a muri komo un mártir den un akto, kaminda a kita su kabes na aña 230.

Pa yega na e nominadonan ku ta ser galardoná despues, Direktiva di AMAK ta tuma konseho serka diferente media i tambe empresarionan den mundu di farándula. 

Ta bon pa nos menshoná tambe, ku durante un reunion di direktiva di Amak djarason 18 di novèmber 2020, e direktiva konforme statuto i reglanan doméstiko, a tuma 2 desishon importante pa kumpli ku tareanan eksesivo di e òrganisashonnan  spesialmente durante di e periodo di krisis aki.

Ta trata aki  e.o  nombramentu di sr.Rignald Maduro komo bosero  di Amak i Curacao Festival Center i pa agregá un miembro músiko hóben den direktiva.Na momento ku tur e trámitenan ofisial tuma lugá, lo duna publisidat di e kandidato pa direktiva.

Finalmente palabranan di forsa na tur Músiko i artista, ku na e momentunan aki ta pasando situashonnan finansiero i emoshonal hopi difísil i ban spera ku pronto e resultadonan di Covid-19 lo bira mas faborabel di manera ku Farándula por bira operashonal den un forma responsabel manera esaki ta deskribí den e protokòl Nr 3 di e Komishon na Interes di Farándula (KIF).

 

Direktiva di AMAK

Manfred Feko Gomes

This site uses Akismet to reduce spam. Learn how your comment data is processed.

error: Content is protected !!
%d bloggers like this: