ALIANSA ku proyekto pa konsientisá pueblo dia 25 di novèmber “Para Un Ratu Den Su Sapatu”
ALIANSA ku proyekto pa konsientisá pueblo dia 25 di novèmber
“Para Un Ratu Den Su Sapatu”
Willemstad – Nashonnan Uní ta hasi un yamada na mundu hinter pa usa e fechanan for di dia 25 di novèmber te dia 10 di desèmber komo dianan di aktivismo pa eliminá violensia kontra di hende muhé. Plataforma Aliansa, ku ta konsistí di 27 organisashon, ta partisipá na e 16 dianan di aktivismo ku diferente aktividat. E promé aktividat ta tuma lugá djárason, 25 di novèmber próksimo, Dia Internashonal pa Eliminá Violensia Kontra di Hende Muhé.
Riba e dia aki, Aliansa ta pidi pueblo pa “para un ratu den su sapatu”. Ku e lema aki Aliansa ta pidi komunidat pa para ketu djis un ratu den sapatu di un víktima di violensia doméstiko i komprondé su miedu pa haña mas sla i gòlpi, e falta di rèspèt ku e ta eksperensiá, kon e víktima ta keda degradá i kibrá emoshonalmente, hopi biaha kompañá pa violensia seksual. Tambe, e angustia, desesperashon i e ansha pa haña protekshon pa e menasa stòp. Si un hende por para un ratu den su sapatu bo no por keda indiferente mas. Aliansa ta pidi pa komunidat djòin e lucha aki pa eliminá violensia doméstiko i abusu di mucha.
Personanan ku ke yuda na e kampaña di konsientisashon aki por hasi esaki na e siguiente manera. Djárason, dia 25 di novèmber, entre 10:00 di mainta i 4:00 di atardi por trese un sapatu di un hende muhé, sea di un adulto òf di un mucha, ku no ta usá mas na Kooyman Sta. Maria. Tur esaki ta tuma lugá riba e sitio pa stashoná outo di Kooyman Sta. Maria. E petishon ta pa pinta òf skirbi ku marker òf fèrf un mensahe riba e sapatu ku ta mustra repudio kontra violensia doméstiko. Un mensahe pa e víktima tambe por; por ehèmpel: nos tei pa bo. Si bo no tin fèrf, no ta problema. Bisa un di nos boluntarionan kiko bo ke pa pintá òf skirbí riba e sapatu i nan lo hasi esaki. Si akaso bo no por yega Kooyman Sta. Maria, bo por saka un potrèt i huntu ku un mensahe por pòst esaki riba e Facebook page di Aliansa(Aliansa Curacao) uzan e hashtag(#) #paraunratudensusapatu.
E petishon ta pa kompanianan tambe kolektá sapatunan di tantu famia i koleganan i por laga un persona entregá nan na un di nos boluntarionan pa asina evitá aglomerashon. Entrega ta tuma lugá estilo drive-thru. 12or maneho di Kooyman N.V. lo entregá un chèk na direktiva di Fundashon Aliansa komo un estimulo pa sigui ku e trabounan kontra violensha domestiko i abusu di mucha.
Pa 4:30pm lo tin un rueda di prensa. Durante e rueda di prensa, Aliansa ta lansa su programa di 2021 ku tur hende por sigui riba Facebook i ku lo wordu manehá pa hóbennan. E poblashon migrante ta bai rekordá femisidio kometé den nan komunidat, UNHCR (e agensia di refugiadonan di Nashonnan Uní) ta bai hasi entrega di flyers ku nan a traha na Papiamentu i Spaño, un representante di prensa huntu ku algun miembronan di Aliansa lo hiba palabra. Algun organisashon amigu den eksterior tambe lo hiba palabra. Kordinado di Plan Nashonal Kontra Violensha Domestiko tambe a keda invita
Komo akto di prekoushon vigigente Aliansa ta informá pueblo di Kòrsou lo siguiente:
Aliansa lo sòru pa sera e área p’asina limitá aglomerashon di hende i tene esaki na e kantidat indiká dor di gobièrnu. Ta pidi pa bisti tapa boka pa prevení un posibel oumento den e kasonan di kontagio lokal di COVID-19. Esnan ku no tin un tapa boka, no por partisipá den e área kaminda e aktividat ta tuma lugá. Hóbennan di Brigada di Seguridat lo kana rònt i rekordá personanan pa tene distansia sosial i kontrolá ku di bèrdat tur hende tin nan tapa boka bistí.
Diferente organisashon ta djòin Aliansa den su aktividat dia 25 di novèmber próksimo i pa esaki nos ta sumamente agradesido, nan ta: Venex, Stima, Salú pa Tur, Sosiedat Bolivariana, CuraPlus, UNHCR (Agensia di Refugiadonan di Nashonnan Uní), Fundashon Foko, Aliança Femenina i Soroptimist Internashonal Club òf Curaçao. Aliansa ta yama Kooyman NV masha danki pa nan sosten na e proyekto aki pa asina konsientisá i eliminá violensia kontra di hende muhé i abuso di mucha.
