Entre konfèti i Skèrpentina ta título di e buki i e pelíkula: Karnaval,  kurason di un pueblo! 

Entre konfèti i Skèrpentina ta título di e buki i e pelíkula: Karnaval,  kurason di un pueblo! 

Coridja Stars Productions ku dos obra di nivel i pa Historia di è fiesta di euforia  

“Karnaval di Kòrsou” 

Durante di un rueda di prensa ayera tardi na The Movies, Coridja Stars Productions a presentá otro mahestuoso proyekto pa seya historia di nos fiesta máksimo kultural karnaval.

Presidente di Coridja Stars Productions, sra. Corrine Djaoen-Genaro, a konta ku e la usa tur su energia i amor ku e tin pa e fiesta, pa realisá tantu e buki komo e pelíkula.

E kombinashon aki lo yuda  informá, forma I eduká generashonnan ku ta sigui’.

Minister di Ekonomia sr. Steven Martina su palabranan elokuente, a ilustrá e balor di un proyekto asina’ki pa kultura, ekonomia I turismo.

Den un  palabra, un pesentashon ku a laga prensa bon informá i enkantá ku e regalo pa Pueblo di Kòrsou.

Nos komunidat lo keda benefisiá  pa medio di un resúmen i kompilashon di kon tur kos a kuminsá i desaroyá den  e goya ku nos tin…nos kos…nos kreashon…nos orguyo ..” Kurason di un Pueblo”.

Sr. Norwin Pieternella a bini ku e título di e obra skibí “Kònfèti i skèrpentina”

Kònfèti i skèrpentina ta inspirá riba e punto di bista festivo, kaminda den selebrashon un eksploshon di alegria ta kulminá den un yobida kolorido, dòrnando kualke espasio será òf públiko. Kònfeti i skèrpentina for di inisio i te ku presente ahinda ta keda usá den nos máksimo ekspreshon/ selebrashon di alegria…..Nos Karnaval i entre nan….historia i rekuerdonan bunita ta keda BIBU.

Mas aleu sr. Pacheco Domacasse a splika su motivashon pa partisipá na realisashon di e proyekto:

 

Permití mi formulá mi motivashon pa partisipá na realisashon di e proyekto ‘Historia di Karnaval di Kòrsou’ di e siguiente manera:

Ta trata aki di dokumentashon di proseso evolushonario di historia di karnaval di Kòrsou den transkurso di tempu; un proseso ku sin duda por ser konsiderá komo un di e hazañanan popular i sosio-kultural mas importante di Pueblo di Kòrsou e último 10 dékadanan. Riba su mes dokumentashon ta di gran importansia, pasobra e ta informativo-edukativo i konsekuentemente ta ampliá konosementu riba sierto tereno spesífiko. Esaki na su turno ta kondusí na formashon di un mihó opinion i balorashon korekto di importansia di sierto realidat òf fenómeno.

Pa loke ta trata e obra ‘Historia di Karnaval di Kòrsou’ a hasi e máksimo esfuerso pa intensifiká e benifisionan di dokumentashon deskribí, dor di proyektá historia evolushonario di nos Karnaval den un konteksto mas amplio i dimenshonal. Esaki pues, lo aportá na un konosementu mas detayá i konsekuentemente mas kla i kompleto di e tópiko konserní. Den e kuadro aki a krea struktura di e obra riba e siguiente partinan básiko: Evolushon di karnaval for di fiestanan popular na Oropa Antiguo; Origen di e nòmber ‘karnaval’ na Roma Antiguo; Yegada di karnaval na Kontinente Merikano; Plamamentu di Karnaval den Suramerika; Origen di Karnaval Karibeño na Trinidad & Tobago i Evolushon di karnaval na Kòrsou.            

Sr. Dolph van Stapele a konta, kon e la drenta den e proyekto ku pa su persona “Kòrsou meresé”.  Karnaval, kurason di un pueblo.

Dos aña pasá, karnavalista Corrine Djaoen-Genaro a aserkà mi pa traha un pelíkula di e historia di karnaval di Kòrsou ku en parte 50 aña di karnaval modèrnu di Kòrsou. Mi a tuma e proyekto ku brasa habrí. Esaki a resulta den un kolaborashon fantastiko i un obra genial.

Dolph ta deskribí e pelikula komo un retrato di e hende tras di karnaval. E obra ta tira un bista riba historia di nos karnaval, pero e enfoke ta mas riba e kaminda pa nos gran marcha!

E obra a wòrdu trahá tumando en kuenta ku e fiesta kultural aki ku tin un gran impakto riba nos pueblo I lo wòrdu kompartí internashonalmente. Karnaval ta wòrdu selebra mundialmente; esaki ta e edishon Kurasoleño.

Nos ta bibando den tempunan straño i pa promé biaha den hopi tempu nos no ta bai selebrá karnaval. Ohalá e pelíkula aki lo por sirbi komo un bunita homenahe na di karnaval di Kòrsou.

Dolph tin 25 aña bibando na Kòrsou. Ela siña e trabou di sineasta aki mes i a kuminsá traha komo kamarógrafo den 1997. Además semper ela usa su fishi pa profilá Korsou na diferente manera den eksterior. Komo kamarógrafo ela traha pa NOS i a produsí varios komersial lokal i internashonal. Tempu di Beijing na 2008 huntu ku in tim chikitu e tabata responsabel pa notisianan di radio, korant i televishon pa Kòrsou. Pero probablemente ta ‘Tula, the Revolt’ ta su trabou mas konosí. Aparte di su funshon komo kamarógrafo e tabata ko-inisiador. Ku su ekperensha amplio den e aria aki Dolph su vishon ta pa elevá e industria di sine na Kòrsou na un plano mas haltu dor di konstruí un puente pa e mundu di sine internashonal. Huntu ku entre otro produkshonnan resien manera Buladó i Atardi, e obra aki ta pinta un pintura variá di nos dushi isla. Tin hopi kuenta mas pa konta, segun Dolph. Dolph sigur lo no stop ku e mundu di sine.

Coridja Stars Productions ta gradisí su patrosinadó I sostenedónan ku ta: Curacao Tourist Board, Medical Laboratory Services, Vertegenwoordiging van Nederland, Curacao Airport Holding, Curacao Ports Authorithy, UTS, Diamonds Casino Maduro & Curiel’s Bank, Bureau Telecommunicatie & Post I Dutch Caribbean Air Navigation Services.

Coridja Stars Productions ta spera ku Pueblo di Kòrsou lo tin momentonan ameno I edukativo den seno familiar, sosial i/o karnavalesko.

Tantu e buki komo e pelíkula lo estrená na Kòrsou dia 4 di febrüari 2021.

Karchi lo ta na benta for di 1 di janüari 2021 na The Movies Curacao.