CBCS nombrá Presidente Transitorio di  International Forum for Investor Education (IFIE) 

CBCS nombrá Presidente Transitorio di 

International Forum for Investor Education (IFIE) 

Willemstad/Philipsburg – Centrale Bank van Curaçao en Sint Maarten (CBCS) a keda nombrá komo  Presidente Transitorio di International Forum for Investor Education (IFIE), un organisashon  internashonal pionero, fundá na 2005 pa entidatnan regulatorio di Australia, Canada, Hapon, Korea,  Reino Uní i Estádos Unídos. 

IFIE ta un organisashon pionero riba tereno di kompetensia finansiero, resistensia finansiero i strategia  pa edukashon di invershonista. IFIE ta traha riba fortalesementu di e rekursonan nesesario pa krea i  implementá norma, best practice i strategia, trahando ku su miembronan, partnernan i partinan interesá  di tur sektor i hurisdikshon. 

IFIE ta konsultá i kolaborá ku International Organization of Securities Commissions (IOSCO) i ku  Organization for Economic Co-operation and Development (OECD), kompartiendo informashon i  rekurso i trahando huntu riba e trabou krusial di desaroyá e tereno di kompetensia  finansiero/edukashon di invershonista na nivel di maneho, di desaroyo di kapasidat i liderazgo i na  nivel di implementashon. Ademas, IFIE ta traha komo partner di otro partinan interesá manera  Aflatoun International, pa fortifiká e rekursonan disponibel mundialmente pa implementashon di  inisiativa riba tereno di edukashon finansiero i sosial. 

CBCS, representá pa Sr. Errol Cova, lo tin e enkargo di dirigí e organisashon mundial akí atraves di e  tempu difísil aktual, te ora e siguiente hunta keda elegí na sèptèmber di 2021. E kompromisonan  internashonal di alto nivel ku e enkargo akí lo trese kuné lo hisa e nivel di visibilidat, rekonosementu i  reputashon di nos infrastruktura regulatorio (i di supervishon), kontribuyendo asina na desaroyo di  nos supervishon finansiero i di merkado di kapital. Ademas, CBCS por hasi bon uso di IFIE pa mehorá  e kuadronan regulatorio pa protekshon di konsumidó i invershonista, loke por resultá den un merkado  di kapital i finansiero (lokal) ku ta funshoná mihó i ku ta bon adaptá na e merkadonan internashonal. 

Esei lo hasi nos un destinashon mas atraktivo pa e institutonan finansiero internashonal, ku un  merkado mas dinámiko i vibrante, loke na su turno lo kontribuí positivamente na kresementu  ekonómiko, prosperidat i bienestar finansiero di Kòrsou i Sint Maarten.

Hunta di IFIE ta konsistí di miembro di diferente organisashon mundial manera: IOSCO,  (organisashon ku ta fiha norma internashonal), CFA Institute (organisashon internashonal riba tereno  di kualifikashon profeshonal), FINRA (entidat regulatorio estadounidense), OSC (entidat regulatorio  kanades), EFAMA (federashon europeo di fondo di invershon), ANBIMA (entidat regulatorio  brazilero), JSDA (entidat regulatorio hapones) i otro outoridatnan regulatorio di merkadonan avansá.  Mas informashon riba IFIE ta disponibel riba nan wèpsait https://www.ifie.org. 

Willemstad, 2 di desèmber 2020 

CENTRALE BANK VAN CURAÇAO EN SINT MAARTEN