Enbes di lamentá e kódigo oraño Gobièrnu mester introdusí desaroyonan nobo.

 

Enbes di lamentá e kódigo oraño Gobièrnu mester introdusí desaroyonan nobo.

Willemstad- Parlamentario Calmes ta duda ku ta den un frega di wowo Hulanda a pone Kòrsou den kategoria oraño ku ta restringí pasaheronan bini for di Schiphol. Gobièrnu no a antisipá esaki?

Buelonan entre Schiphol i Hato, for di inisio di COVID-19, semper a wòrdu protehá pa gobièrnu miéntras a restringí otro paisnan. Calmes no ta komprondé ku e Minister di Ekonomia ta bisa ke ta lamentá e desishon di Hulanda. Hulanda ku su rason ta wak kon protehá su ekonomia i su siudadanonan. “E hecho ku Hulanda a duna Kòrsou e kódigo oraño mester ta un lès pa Gobièrnu” sigun Calmes.

Resientemente Delta-Airlines i tambe KLM a introdusí e asina yama “Corona free flights”.  Pe buelonan entre Schiphol i Atlanta Airport ámbos kompania a bini ku reglanan estrikto. Kada pasahero mester hasi un PCR tèst tres dia promé bula, na “airport” di salida mester hasi un otro tèst i na “airport” di yegada tambe mester hasi un tèst. Calmes:”Dikon gobièrnu no ta introdusí un prosedura similar i pone KLM/TUI kumpli?”. 

Atrobe falta di kapasidat di gobièrnu pa respondé riba desaroyonan tin impakto negativo pa nos ekonomia i turismo. Mas desempleo na kaminda? No tin un solushon pa COVID-19 ainda. Sinembargo terkedat i arogansia dje gobièrnu aki ta limitá nan di por implementá solushonnan. Esaki kada bes ta hundi nos mas i mas.

Enbes di lamentá e desishon di Hulanda, Calmes ta propon’é pa kuminsá hasi loke Delta/KLM i Atlanta airport/Schiphol a hasi enbes di mantené e kas di palomba ku nos tin.