KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNUNOTISIA

PIN ta hopi preokupá pa plamamentu di COVID 19 den nos komunidat

 

 

PIN ta hopi preokupá pa plamamentu di COVID 19 den nos komunidat

Den un tempu rekòrt nos tin un kantidat grandi di kontagio ku Covid 19 i e di 8 morto na Kòrsou. Nos sistema di salú, tantu dòkternan di kas, hospital i salú públiko i sigur e servisio di epidemiologia ta bou di preshon serio. E situashon ta forma un peliger pa pashèntnan di Covid i pashèntnan ku otro malesa di kual tratamentu médiko ta keda posponé. 

 

Pueblo ta kansá i emoshonalmente kargá. Un parti di nos siudadanonan ta biba den isolashon i pobresa i ta dependé di pakete di kuminda. Hopi hende a pèrde trabou, negoshinan ta dependé di yudansa di gobièrnu i komunidat tin hansha pa futuro. Violensia den kas a subi, maestronan di skol, hendenan den kuido, dokternan i enfermeronan i amtenarnan ta traha bou hopi preshon. Komunidat ta den un situashon di hopi tenshon awor ku Covid-19 ta mustra di ta saliendo for di man. PIN ta konsiente ku maneho di e pandemia no ta nada fasil. Kontinuamente mester evaluá i yega na un balansa entre di un banda medidanan nesesario, pero ku ta limitá nos sistema di bida pa mantené nos salú; i di otro banda mester tene kuenta ku nos ekonomia no por wanta muchu mas medida i ku’n hende sin seguridat di entrada i ku hopi stres finansiero, tambe por bira malu. Nos mester realisá ku hopi hende ta dependé pa nan pan di turismo, ku ta bin prinispalmente di Hulanda i Merka, i ku si nos no logra baha e kantidat di kaso di Covid 19, nos ta pèrdè tantu nos salú komo nos entrada. Un sirkulo realmente visioso. PIN ke kontribuí na maneho di e pandemia i ta proponé pa e momentu aki lo siguiente:

 

  1. Stipulá ku mainta te 12.00 or hende riba 60 aña òf ku ta den un kategoria vunerabel òf ku ta traha warda, so ta bai supermerkadonan, botika etc. Evitá aglomerashon, krea un ambiente mas sigúr i purba evitá ku mester re-introdusí plachi di dia of lockdown.
  2. Refreská e reglanan pa establismentunan e.o. supermekado, botika, snèk, trùk di pan, hotel i restorant etc. huntu ku nan management, pa por yuda nos pueblo tene kuenta dor di strepi riba suela, sanitizer na porta, etc. 
  3. Enforsá e máksimo di hende pa kada estabilisimentu, pa evitá aglomerashon.
  4. Amplia e tim di asistensia sosial na komunidat ku sikólogonan i sosiólogonan, pa por atendé k’un pueblo kansá di reglanan di Covid, ku a pèrde entrada i ta spantá pa e malesa; òf ku nètamente ta konvensí ku e pandemia no ta real.
  5. Amplia e tim di komunikashon di gobièrnu ku sikólogonan i sosiólogonan pa yuda determiná e manera pa komuniká mas efektivo ku un pueblo bou di strès pa basta tempu.
  6. Inkluí mas servisio/tratamentu di sikólogo den e pakete ku SVB ta paga, pa mas hende por haña asistensia direkto pa nan problema partikular i guia den e area mental.
  7. Dediká e rueda di prensa riba Covid solamente na Covid i temanan relashoná ku Covid, pa asina mantené e e atenshon pa Covid. No usa e orario pa otro temanan di gobernashon.
  8. Mantené e medidanan di higiena, distansia sosial, ‘toke de keda’, lei seku. Sera e establisimentu ku no kumplí i duna e persona ku faya un but, via hustisia rápido (snelrecht). No laga mayoria bira víktima di algun.
  9. Duna atenshon spesial na esnan ku ta traha bou ku hopi preshon, en todo kaso na maestronan di skol, hendenan den kuido i polis i inspektornan. 
  10. Stimulá doñonan di trabou pa laga mas tantu hende posibel traha na kas.
  11. Introdusí splikashon kon promové salú i prevenshon di malesa, dor di duna informashon kon kome salú i planta bo mes kuminda sano i yuda e pòtmoni; kon move 30 minüt pa dia den i rondó di kas; kon usa produktonan natural pa fortifiká bo sistema imunológiko; duna tip kon atendé ku salú mental; i kon tur otro tipo di problema ku por surgí den e tempu aki.
  12. Instalá e liña di telefòn bèk kaminda pueblo por hasi pregunta riba tópikonan relashoná ku COVID-19, entre otro riba asistensia sosial i sikológiko, i otro tópikonan di preokupashon.

 

639114718427035"
639114718427035"