SITUASHON DI KORIENTE A NORMALISA

 

SITUASHON DI KORIENTE A NORMALISA

 

Willemstad 8 desèmber 2020 – Despues di a eksperensiá un ‘blackout’ djaluna 7 di desèmber 2020, por bisa ku Aqualectra a logra pa normalisá e situashon di koriente. Aktualmente ta trahando duru pa garantisá un suministro di koriente stábil, mientrastantu ta hasiendo e ehersisionan nesesario pa investigá e faktornan ku por a kousa e ‘blackout’ aki. Di e forma aki lo tuma e pasonan nesesario pa kontra-arestá un desperfekto di e magnitut aki den futuro. Pa loke ta trata e faktor di skarsedat di kapasidat di hende, komo konsekuensia di empleadonan den isolashon òf karentena pa motibu di COVID-19, tambe Aqualectra ta atendiendo debidamente, pa por solushoná esaki riba korto plaso.

 

Aqualectra ta lamentá e ‘blackout’ ku a tuma lugá djaluna último, sigur despues di tur e esfuersonan ku e kompania a bini ta hasi tur e lunanan tras di lomba pa por protehá salú di su empleadonan i tambe pa garantisá kontinuidat di suministro di utilidat. Aqualectra lo sigui hasi tur lokual ta posibel pa sigui instrukshonnan di outoridatnan di salubridat públiko na Kòrsou pa sigui protehá tur nos empleadonan, i nos komunidat. 

 

Pa medio di e komunikado aki Aqualectra ta bolbe ekstendé diskulpa na komunidat pa e blackout ku a sosodé. Konsiente di e impakto di un akontesimentu asina’ki riba nos komunidat, Aqualectra ta hasi su máksimo esfuerso pa prevení algu asina’ki. Sinembargo, manera ya Aqualectra a informá, siendo un isla chikitu, ta dífisil pa deskartá un ‘blackout’ kompletamente mirando ku nos isla ta aislá for di otro islanan i no tin e konekshonnan nesesario pa por risibí e sosten den kapasidat na momentu ku tin nesesidat di esaki.  

 

Aqualectra ta gradisí kada un di su empleadonan pa tur esfuerso i trabou duru desplegá pa a restablesé e konekshon di koriente bèk. Un danki ta bai na Curaçao Refinery Utilities (CRU) pa e yudansa durante di e proseso pa reestablesé suministro di koriente.  Aqualectra ta deseá tur su empleadonan i tur persona ku a wòrdu afektá pa COVID-19 pronto rekuperashon. Finalmente un apelashon ta bai na un i tur pa sigui kuida kurpa i keda seif. 

This site uses Akismet to reduce spam. Learn how your comment data is processed.

%d bloggers like this: